Bu gün Sumqayıt şəhər Heydər Əliyev Mərkəzində 28 may - Respublika günü münasibətilə S.Rüstəmov adına 3 saylı Uşaq İncəsənət məktəbinin təsviri incəsənət sinfinin şagirdlərinin rəsmlərindən ibarət sərgi keçirilib.

Sərgidə 13 şagirdin ümumilikdə 93 rəsm əsəri nümayiş etdirilib.

Şəhər Mədəniyyət və Turizm İdarəsi, Gənclər və İdman Baş İdarəsinin dəstəyi ilə keçirilən tədbirdə Məktəbin skripkaçılarının ifasında milli və dünya musiqisindən klassik əsərlər səsləndirilib.

Sərgiyə baxış keçirən Mədəniyyət və Turizm İdarəsinin nümayəndəsi Arif Vəliyev, Gənclər və İdman Baş İdarəsinin məsul işçisi Ceyhun Hüseynov, Dövlət Rəsm Qalereyasının direktoru Ellada Rəşidova, S.Rüstəmov adına 3 saylı Uşaq İncəsənət məktəbinin direktoru Əziz Əzizov, Heydər Əliyev Mərkəzinin direktoru Aygün Zülfüqarlı çıxışlarında şagirdlərin yaşlarının kiçik olmalarına baxmayaraq gözəl rəsmlər yaratdıqlarını və bu istedadlarının gələcəkdə daha da inkişaf edəcəyinə əmin olduqlarını bildiriblər. Ölkəmizdə istedadlı yeniyetmə və gənclərə göstərilən diqqət və qayğıdan geniş söhbət açılıb.

Sərgidə iştirak edən şagirdlər və müəllimə Firuzə Rüstəmova Fəxri Fərman və hədiyyələrlə təltif edilib.