"Dünya nağaraları” adlı musiqi yarışmasında Azərbaycan 2-ci dəfədir ki iştirak edib. Bu dəfə də ölkəmizi Sumqayıtdan "Rövşən” ritm qrupu təmsil edib. Qrupun yaradıcısı və rəhbəri Rövşən Cabbar Xeberle.com-a öz təəssüratlarını bölüşüb: "13-cü beynəlxalq ritm festivalında artıq ikinci dəfədir ki, iştirak edirəm. Ötən il 10 nəfərlik heyətlə - qrup şəklində uğurla çıxış etmişdik. Builki dəvət isə bir az fərqli və gözlənilməz oldu. Çünki dəvət yalnız mənə gəldi. Adətən festivaldan bir həftə öncə bir neçə sənətçi dəvət olunur ki, orada dərs öyrənmək üçün gələn tələbələrə müxtəlif dünyəvi ritm alətlərində ustad-dərsləri keçsinlər. Mənə də seçilmiş sənətçi kimi 1 həftə öncə gəlmək təklif olundu. Bu fürsətdən müksimum yararlanaraq ritm alətlərinə marağı olanlara dərlər keçdim. İki gün davam edən festivalda da öz bacarıqlarımı nümayiş etdirdim. Başqa ölkə və şəhərlərdən gələn ustad sənətçilərlə eyni səhnədə bir xeyli ritmlər ifa etdik. Bunu deyə bilərəm ki, kənardan nə qədər əyləncəli və gözəl görünsə də, səhnədə başqa xalqların ustadları ilə birlikdə ifa etmək böyük diqqət və dəqiq reaksiya tələb edir. Şadam ki, bunun öhdəsindən gələrək Azərbaycanımızı layiqincə təmsil etdim” – sitatın sonu.

Rövşən Cabbar gələcəkdə də bu cür festivallara qatılaraq hər zaman musiqi dəyərlərimizi təbliğ etməyə hazır olduğunu söyləyib.