Ölkəmizin şimal rayonlarında yaşayan xristian icmasının üzvləri Pasxa bayramını qeyd edirlər. Onlar aprelin 16-dan Xaçmazdakı "Müqəddəs möcüzəvi Nikolay” pravoslav kilsəsinə gələrək dini ayinlər həyata keçirirlər.
Xeberle.com AZƏRTAC-a istinadən xəbər verir ki, bayramla əlaqədar kilsədə hər gün şamlar yandırılır. Aprelin 24-də dini icma üzvləri kilsədə dualar, pasxa nəğmələri oxuduqdan sonra, dünyasını dəyişən yaxınlarının qəbirlərini ziyarət ediblər.
Bayramla əlaqədar əvvəlcədən xüsusi hazırlıq görülüb, şirniyyatlar bişirilib, Pasxanın rəmzlərindən sayılan yumurtalar boyanıb.
"Xaçmaz Rayon Rus İcması” İctimai Birliyinin sədri Azər Panamarçuk Pasxa bayramının qədim və xristian dünyasında ən önəmli bayramlardan biri olduğunu bildirib. Bu dini bayram İsa peyğəmbərin çarmıxa çəkilməsindən üç gün sonra yenidən dirilməsi ilə əlaqədardır. Pasxa hər il bahar fəslində qeyd olunur.
A.Panamarçuk Azərbaycanın şimal bölgəsində yaşayan xristianların Pasxa bayramını hər il yüksək səviyyədə qeyd etdiklərini vurğulayıb.

 

 

 

Xəbərdən istifadə edərkən istinad etmək vacibdir.