Sumqayıt Regional Mədəniyyət və Turizm idarəsinin tabe müəssisələrində Azərbaycan Respublikası Mədəniyyət və Turizm Nazirliyinin təşkilatçılığı, YUNESKO , BMT-nin Sivilizasiyalar Alyansı,BMT-nin Ümumdünya Turizm Təşkilatı, BMT-nin Ərzaq və Kənd Təsərrüfatı Təşkilatı, Avropa Şurası və İSESKO-nun tərəfdaşlığı ilə keçirilən IV Dünya Mədəniyyətlərarası Dialoq Forumu ilə əlaqədar silsilə tədbirlər keçirilib.
Sumqayıtın Tarixi Muzeyində təşkil olunan "dəyirmi masa” da N. Nərimanov adına Mədəniyyət Mərkəzi, "Dostluq” mədəniyyət evi, N.Gəncəvi adına kitabxana klub, Ə.Vahid adına kitabxana filial, Qubadlı və Laçın rayon tarix diyarşunaslıq muzeylərinin əməkdaşları, Sumqayıt YAP Qadınlar Şurasının nümayəndələri, 14 saylı məktəbin müəllimləri iştirak ediblər.
Tədbirdə müzakirələrlə yanaşı,  zorakı ekstremizmin qarşısının alınması, miqrant və qaçqınların problemlərini əks etdirən 30 dəqiqəlik film nümayiş edilib.
Abşeron rayon Masasır qəsəbəsində zəngilanlılar üçün salınmış qəsəbədə keçirilən tədbirdə mədəniyyət müəssisələrinin özfəaliyyət kollektivləri konsert proqramı ilə çıxış ediblər.
Bundan əlavə, Zəngilan rayon Mərkəzi kitabxanasında geniş tədbir keçirilib. Tədbiri giriş sözü ilə kitabxananın direktoru Məhruzə Cəfərova açaraq bildirib ki, əsrlər boyu  Azərbaycanda xalqlar həmişə müxtəliflik mühitində yaşayıb. Multikulturalizm, etnik və dini müxtəliflik tariximizin bir parçası və bugünkü reallıqdır.  Mədəniyyətlərarası Dialoq haqqında danışanda bizə aydın olur ki, həmin dialoqun uğurunun təsirini hər bir sahədə - siyasi həyatda, təhlükəsizlik ilə bağlı sahələrdə və iqtisadi əməkdaşlıqda görmək olar.  
Kitabxananın Abonoment bölməsinin  müdiri T.Məmmədova "Mədəniyyətlərarası dialoqun inkişafı: İnsan təhlükəsizliyi, sülh və davamlı inkişaf üçün yeni imkanlar” mövzusunda çıxış edib.
Xızı rayonunun mədəniyyət müəssisələrində seminar və dəyirmi masalar təşkil edilib.
 

Xəbərdən istifadə edərkən istinad etmək vacibdir.