Bir millətin gözəl davranış tərzi ədəbiyyatında, ədəbiyyatının da ən canlı ifadəsi teatrında bəlli olar deyiblər. Xeberle.com olaraq 17 illik fasilədən sonra 2016-cı ildə yenidən fəaliyyətə başlayan Sumqayıt şəhər "28 May” Diyarşünaslıq evi Xalq Teatrının işçi heyəti ilə həmsöhbət olduq. Direktor Vüsal Yaqubludan ilk olaraq teatrın yenidən fəaliyyət göstərməsi ilə bağlı məlumat aldıq.

 

Fəaliyyətə  əvvəlcə teatrın ştatlarını tənzimləməklə başladıq.
Mən "28 May” Diyarşünaslıq evinə təyin olunan gündən, yəni iki il bundan əvvəl burada xalq  teatrı üçün ştatlar var idi, hansı ki, fəaliyyəti dayandırılmışdı. Biz qərara gəldik ki, teatrın yaradıcı tərəfini inkişaf etdirək və bunun üçün də işə ilk olaraq rejissor, quruluşçu rəssam kimi ştatları tənzimləməklə başladıq.  Sumqayıt şəhər Mədəniyyət və Turizm Regional İdarəsinin rəisi  Mehman Şükürovun rejissor Amil Babayev və quruluşçu rəssam Aytən Xanəliyeva kimi peşəkar kadrların işə götürülməsində bizə çox köməyi oldu. Biz əvvəlcə Xocalı kompozisiyasını geniş şəkildə hazırladıq və tamaşaçılara təqdim etdik. Tamaşa çox bəyənildi və biz düşündük ki, deməli bu işlərin davamını gətirə bilərik. Bundan sonra əlavə əsərlər götürüb üzərində işlədik. 2016-cı ilin iyun ayında "Qaynana əməliyyatı” adlı ikipərdəli teatr tamaşasını səhnələşdirdik. Daha sonra Üzeyir Hacıbəyovun bütün əsərlərindən ibarət "Mənim yaşatdıqlarım”adlı teatral şəkildə bir iş nümayiş etdik. Bu  il teatrımızın qırx illiyi, II Respublika Xalq Teatrları Festivalı ilə bağlı bir iş ərsəyə gətirmək istədik və nəticə olaraq festivalda 3-cü yerin qalibi biz olduq.
Bizimlə əməkdaşlıq etmək istəyənlərin sayı artıb.
Ümumiyyətlə biz gələcək aylarda görüləcək işləri əvvəlcədən planlaşdırırıq. Festivala qatılmaq kimi məsuliyyətli bir işi üzərimizə götürdüyümüz üçün ona daha qətiyyətlə hazırlaşmağa başladıq və nəticəsini də gördük. Hazırda bizimlə əməkdaşlıq etmək istəyənlərin də sayı artıb.
Qələbəmiz çəkdiyimiz əziyyətin bəhrəsidir.
Tamaşa seçimini çoxsaylı müzakirələr əsasında etdik. Əvvəlcə psixoloji əsər üzərində işlədik. Bu əsər könüllülər üçün çox ağır olduğuna görə hətta bizi  ay yarm geriyə saldı. Festivala Amil Babayev də daxil olmaqla 5 nəfər heyətlə qatıldıq və bunlardan dördü - Əliyev Elmir, Məcidov Cəlal, Əmrahova Əzizə, Cəlilova Günel bizim könüllülər idi. Amil Babayev və könüllülərin birlikdə gördükləri bu təqdirəlayiq iş bizim qalibiyyətimizə səbəb oldu. Qalibiyyətimiz çəkdiyimiz əziyyətin bəhrəsidir.

 

 
Rejissor Amil Babayev: Fəaliyyətimizdə Yalçın Səlimovun dəstəyi danılmazdır.
Mən bura gəldiyim ilk gündən Sumqayıt Dram Teatrının aparıcı aktyoru Yalçın Səlimov mütəmadi olaraq bizə kömək edir. Onunla çox yaxın olduğumuza görə elə zənn edirəm ki, o da  buranın işçisidir. Elə vaxt olub ki, mənim işim olub və işimi ona tapşırıb getmişəm. Çox sağolsun ki, bir qardaş, dost  kimi bizə yardımçı olub.
Aktyor seçimində əsas olaraq xarakterə üstünlük verirəm
Aktyor seçimində mənim ən üstün tutduğum cəhət onun səmimi, saf olmasıdır. Deyirlər ki, pis kadra yaxşılıq öyrətmək olmur, amma yaxşı insana iş öyrətmək olur. Yəni işi öyrətmək üçün qarşımızdakının yaxşı insan olması kifayət edir. Hazırda kollektivimizdə 9-10 nəfər var. Festivala qatılmaq üçün bizim sırf 5 nəfərə ehtiyacımız olduğundan digərlərinə müraciət etmədik.
Kaş ki, tamaşalarımızı daha çox adam izləyə biləydi.
Günümüzdə dövlət teatrları kimi biz də tamaşaçı baxımından problemlərlə qarşılaşırıq. Adından məlum olduğu kimi bu teatr xalq teatrı olduğu üçün biz sırf xalqın içindən çıxan adi insanları,gəncləri bu işə cəlb edirik, hansı ki, onların aktyor olmaq istəkləri var, lakin müəyyən səbəblərdən bu işin təhsilini ala bilməyiblər. Bizdə digər regionlara nisbətən işçi heyətini bir yerə yığmaq daha çətindir. Çünki bura xalq teatrıdır və  aktyorların  iş qrafiki də sərbəstdir, ona görə də məşqlər onların işləri ilə üst- üstə düşdüyü zaman məcbur olub vaxtı dəyişirik. Digər regionların xalq teatrlarının işçi heyəti ilə çox yaxın tanışlığımız yoxdur, yalnız salam-sağolumuz var. Festivalda hamı öz çıxışının qalib ola biləcəyindən danışırdı. Təkcə bizim səsimiz çıxmırdı. Sonda üçüncü yer qalibinin adı çəkildiyi zaman onlar bizə təəccüblə baxırdılar, çünki heç kim bizim qalib olacağımızı gözləmirdi. Kaş ki, tamaşalarımızı daha çox adam izləyə biləydi.
Festivaldakı qalibiyyətimiz könüllülərin əziyyətlərinin bariz nümunəsidir.
Teatrımızın işçi heyətinin demək olar ki, hamısını gənclər təşkil edir. Onlar işlərini o qədər həvəslə görürlər ki, artıq bir çoxu bu sahənin ardınca getmək istəyirlər. Bizim festivalda üçüncü yeri tutmağımız onların əziyyətlərinin bariz nümunəsidir və bu insanların o səhnəyə çıxmaqları belə böyük bir nailiyyətdir. Bizim könüllülərimizdən olan Cəlilova Günel Sumqayıt Dövlət Universitetinin filologiya fakültəsinin tələbəsidir. O da gələn il universiteti bitirib aktyorluq sahəsində təhsil almaq fikrindədir. Biz mədəniyyət evinin tədbirlərində, şəhər tədbirlərində də iştirak etmişik. Məşqlərdə çox yorulsaq da uşaqlar səhnədə bizi yaxşı mənada təəccübləndirirlər.
Məcidov Cəlal: "Vüsal Yaqublu bizə qaranlıq görünən yolları işıqlandırdı”
Bizə hansısa rol veriləndə tam canlandıra bilməsək də işin məsuliyyətini dərk edərək öhdəsindən gəlməyə çalışırıq. Məsələn, mənə ağa rolunu canlandırmağı tapşırdıqlarında əvvəlcə çətinlik çəkdim. Amma ağa paltarını üzərimə geyindiyim zaman o ruhu özümdə hiss etdim. Mən Vüsal müəllimə öz təşəkkürlərimi bildirirəm. Ona görə ki, bu sənətə həvəsimiz olduğunu bildiyi üçün bizə özümüzü inkişaf elətdirməyə şərait yaratdı. Bizə qaranlıq görünən yolları Vüsal müəllim işıqlandırdı.
Qeyd edək ki, respublikanın regionlarında fəaliyyət göstərən xalq teatrları üçün təşkil olunan festivalda 32 regionun teatrı iştirak edib, bunlardan 15-i finala vəsiqə qazanıb və Sumqayıt şəhər "28 May” Diyarşünaslıq evinin Xalq Teatrı 3-cü yerin qalibi olub.

Xəbərdən istifadə edərkən istinad etmək vacibdir.