Xəbər verdiyimiz kimi dünən Azərbaycan Yazıçılar Birliyi Sumqayıt şəhər şöbəsinin yeni sədri seçilib. Məlumat üçün bildirək ki, mərhum sədr Sabir Sarvanı bu postda Gülnarə Cəmaləddin əvəz edəcək. Gülnarə Cəmaləddinin bu vəzifəyə seçilməsi şəhərin tanınmış yazarlarından olan Rəhman Orxan tərəfindən birmənalı qarşılanmayıb. Belə ki, o öz facebook səhifəsində buna etiraz edib. Etiraz mətninin olduğu kimi oxucularımıza təqdim edirik:

"Bu gün şəhərimizin saytlarında belə bir xəbərə rast gəldim ki, Azərbaycan Yazıçılar Birliyi Sumqayıt şəhər şöbəsinin yeni sədri vəzifəsinə həmin şöbədə "baş məsləhətçi" işləmiş Gülnarə Cəmaləddin seçilib. 
Mən 1967-ci ildən bu şəhərdə yaşayıram və Sumqayıtın bütün yazı-pozu adamlarını çox yaxşı tanıyıram. Əli Kərim adına Poeziya Klubunun ilk üzvlərindən olmuşam, əsl poeziyanın və nəsrin nə olduğunu da az-çox bilirəm. Odur ki, bu gözlənilməz "seçim" xəbərini eşidib, çaşqınlıq içində qaldım. Axı, hələ bir-iki ay əvvəldən bilirdim ki, sumqayıtlı qələm sahiblərinin demək olar ki, hamısı onun namizədliyinin, sədr seçilməsinin əleyhinə idi... Yaxşı, bəs necə oldu ki?..
Çox təəssüf!...Bildiyimə görə, Sumqayıtın ədəbi ictimaiyyəti nə bu xanımı, nə də onun yaradıcılığını tanıyır. Şəxsən mən indiyə kimi onun haqqında bir qələm adamı kimi heç vaxt eşitməmişəm. Məgər Sumqayıtda başqa yaradıcı namizəd yox idi ki, bu xanım təyin olundu ("seçildi" yox, məhz təyin olundu) bu məsul yaradıcı vəzifəyə? Rəhmətlik Sabir Sarvan hara, heç kəsin tanımadığı bu xanım hara? Belə olmaz axı... Eşitdiyimə görə belə bir söz yayılıb ki, guya onun sədr olmasını Sabir Sarvan özü vəsiyyət edib. Qardaş, axı, dünyadan köçən adam (Allah rəhmət eləsin Sabir Sarvana, gözəl şair idi!) övladlarına özünün şəxsi varidatını vəsiyyət edə bilər, rəsmi bir idarənin rəhbərliyini yox. 
AYB-nin rəhbərliyinin və onun sumqayıtlı üzvlərinin bu "üzgörənliyini" heç kəsə bağışlaya bilmirəm. Axı, bu şəhərin poeziya ağsaqqalı Əşrəf Veysəlli var, Rafiq Yusifoğlu var, "od-alov" şair, bacarıqlı təşkilatçı Ofeliya xanım Babayeva var, Eyruz Məmmədov, İbrahim İlyaslı, Rafiq Oday, Əli Nəcəfxanlı, Sabir Yusifoğlu, Süleyman Hüseynov (10-dan artıq şeir kitabının və sənədli "And" romanının müəllifi), Qadir Sultan, Asif Asiman, Xatirə Fərəcli, Nisə Qədirova var... O xanım öz yaradıcılığı ilə bu şairlərin hansından üstündür ki, sədr vəzifəsinə bu qədər iddialı olub? Gərək özünün ətrafında belə nəhəngləri (!) görüb, o özü bu iddiadan əl çəkəydi. Məsələ yalnız vəzifəyə sahib olub, maaş almaqda deyil. Bu vəzifədə oturan şəxs Sumqayıtda ədəbiyyatın inkişafı, müxtəlif ölkə və şəhərlərlə ədəbi əlaqələrin qurulması, gücləndirilməsi, xarici şair və yazıçıların Sumqayıtda görüşlərinin keçirilməsi, yüksək səviyyəli ədəbi müzakirələrin aparılması, istedadlı gənclərin üzə çıxarılması və onlara dəyərli məsləhətlər verərək, ədəbi ictimaiyyətə təqdim edilməsi ilə bağlı lazımi səylər göstərə biləcəkmi?... İnanmıram. Məncə, bu məsələyə yenidən baxılmalıdır, özü də tezliklə. "Səhv düşəndə yerimiz..." şerini sonradan acı təəssüflə xatırlamamaq üçün..."