2013-cü ilin noyabr ayının 22-də Prezident İlham Əliyev Azərbaycan Xalq Cümhuriyyətinin banilərindən olan Məmməd Əmin Rəsulzadənin 130 illik yubileyi ilə bağlı sərəncam imzalamışdı.

Sərəncama əsasən Azərbaycan Respublikasının Mədəniyyət və Turizm Nazirliyi Azərbaycan Milli Elmlər Akademiyası, Azərbaycan Respublikasının Təhsil Nazirliyi və digər aidiyyəti qurumlarla birlikdə Məhəmməd Əmin Rəsulzadənin 130 illik yubileyinə həsr olunmuş tədbirlər planını hazırlayıb həyata keçirməlidir. Azərbaycan Respublikasının Nazirlər Kabineti bu Sərəncamdan irəli gələn məsələləri həll etməlidir. 

Rəsulzadənin 130 illik yubileyinə 15 gün vaxt qaldığını nəzərə alaraq şou əhlinin bu tədbirlərə necə hazırlaşdığı ilə maraqlandıq. 

Müğənni Abbas Bağırov Qaynar.info-ya açıqlamasında bildirdi ki, onu bu mövzuda hər hansı tədbirə dəvət etməyiblər, ancaq dəvət olarsa, böyük məmnuniyyətlə iştirak etməyə hazırdır. 

"Rəsulzadə və ADR dövrünə mahnı həsr etməyi planlaşdırırsızmı?"  sualına Abbas Bağırovun cavabı belə oldu: "Yalan deməyim. Hazırkı planların arasında belə bir mahnı yoxdur. Amma ola bilsin gələcəkdə bunu nəzərə alaq. Mən şəxsiyyətlərdən bu vaxta qədər Heydər Əliyev, İlham Əliyev, Mikayil Müşviq və Nizami Gəncəviyə mahnı ithaf etmişəm. Ola bilsin gələcəkdə Rəsulzadəyə də mahnı ithaf etdim". 

Müğənni Xatirə İslam isə Qaynar.info-ya açıqlamasında bildirdi ki,  hələlik heç bir tədbirə dəvət almayıb: "Xəstə olduğum üçün səhnəyə az çıxıram". 

Rəsulzadə və ADR-ə mahnı ithaf etmək məsələsinə gəlincə, müğənni bildirdi ki, o siyasətə qarışmır: "Mən siyasətə qarışmıram. Belə mövzulara qarışmıram. Ancaq dövlət tərəfindən deyilsə ki, bu mahnını oxu, oxuyaram, amma özbaşına belə işlərə qarışa bilmərəm. Ancaq göstəriş olmalıdır ki, mən belə mövzuları oxuyum".

Müğənni Baloğlan Əşrəfov isə bildirdi ki, ona dövlət səviyyəsində dəvət gələrsə, böyük məmuniyyətlə belə tədbirlərdə iştirak edəcək: "ADR və Məmməd Əmin Rəsulzadəyə mahnı ithaf etmək məsələsinə gəlincə, onu deyə bilərəm ki, mən daha çox sevgi mahnıları oxuyuram. Belə mahnıları bəstələmək potensialına da malik deyiləm. Bunu daha ciddi bəstəkarla bəstələyə bilər. Amma dövlət tərəfindən deyilsə ki, bu mövzuda mahnı oxu, məmuniyyətlə oxuyaram".