“Chameleon is the first independent cinema of Azerbaijan”
Azərbaycan rejissorları Elvin Adıgözəl və Ru (Rüfət) Həsənovun çəkdiyi “Büqələmun” (Chameleon) filmi Hindistanda keçirilən “Pune Beynəlxalq Film Festivalı”nda iştirak edir.
“Buqələmun” Bəhmən Qubadi (Bahman Ghobadi), Mirko Locatelli, Bil August, Jay Zanken (Zhanken Jia) kimi məşhur rejissorların son filmləri ilə bir kategoriyada “world competition” kategoriyasında yarışır.
Filmin rejissoru Elvin Adıgözəl “Axar.az”a festival haqda açıqlama verib:
“Normal səviyyəli kinofestivaldır. “Pune Beynalxalq Film Festivalı”nda Jia Zhanke kimi Bahman Gobadi kimi rejissorların filmi ilə bir kategoriyada yarışmaq həm Rüfət Həsənova, həm də mənə fəxrdir. Dünən filmə jüri baxdı. Zalda tamaşaçı yer tapa bilmirdi, çünki biletlər alınmışdı. Filmdən sonra Hind mətbuatına müsahibə verdim.
Məndən soruşdular ki, Azərbaycanda neçə azad film çəkən rejissor var? Mən də cavab verdim ki, mən Rüfət Həsənovu, Ramil Adiloğlunu və bir neçə azad film çəkmək istəyən adamı tanıyıram. Yəni, ümumiyyətlə 3-4 nəfər var. Əlbəttə, bu belə də olmalıdır. Çünki hamı azad və fərqli film çəkə bilməz”.
Elvin Adıgözəl Hindistanda verdiyi müsahibədə eyni zamanda “Buqələmun”un Azərbaycan filmləri üçün bir başlanğıc olmalı olduğunu deyib: ““Buqələmun” Azərbaycanın ilk azad kinosudur. Çünki dünya kinosunda tanınmaq başqadır. Düşünürəm ki, “Buqələmun” içində azad film çəkmək hissi olan Azərbaycan rejissorları üçün bir başlanğıc olmalıdır...”
“Sədaqətli Dostlar Haqqında”, “Dönüş”, “O” filmlərinin rejissoru və “Dumanda” filminə görə START Beynəlxalq Kinofestivalda jürinin xüsusi mükafatına layiq görülən gənc rejissor Elvin Adıgözəlin Ru Həsənovla birgə çəkdiyi “Buqələmun” filmi bundan öncə 66-cı “Locarno Film Festivalı”nda iştirak etmişdi.
Qeyd edək ki “Locarno Film Festivalı” “A” kateqoriyalı (ən nüfuzlu) festivallar sırasına daxildir. Kann, Venesiya, Berlin film festivalları da bu kateqoriyaya aid edilir.
Xəbərdən istifadə edərkən istinad etmək vacibdir.
