Azərbaycan tamaşaçılarının uzun illərdir sevə-sevə baxdığı bir sıra milli filmlərin əsas obrazlarını əcnəbi aktyor və aktrisalar canlandırıblar. Bəzilərimiz onları filmdəki qəhrəmanların adı ilə tanıyırıq, gerçəkdə isə kim olmalarından xəbərsizik. Hətta həmin aktyor və ya aktrisanı azərbaycanlı hesab edənlər də az deyil. 

Modern.az saytı “Azərbaycan kinosunun əcnəbi qəhrəmanları” adlı rubrikasında oxuculara milli filmlərimizdə əsas rolların ifaçıları olmuş xarici aktyor və aktrisalar haqqında məlumatın təqdimatına davam edir.  

Bu dəfə Azərbaycan tamaşaçılarının hər nümayişinə maraqla baxdığı, heç vaxt dəbdən düşməyən məşhur “Bəxtiyar” filmindəki əcnəbi aktrisadan bəhs edəcəyik.  

1955-ci ildə rejissor Lətif Səfərova “Sevimli mahnı” (“Bəxtiyar”) filmini çəkmək həvalə olunur. Bu lentlə rejissor böyük kinoda ilk filmini yaradıb. Maraqlıdır ki, filmin ssenarisini ruslar (Boris Laskin və Nikolay Rojkov yazmışdı. Amma ssenari nə qədər beynəlmiləl ruhlu olsa da, film bir o qədər milli alınır. 
Rejissor baş rola – Bəxtiyarı oynamağa dahi müğənni Rəşid Behbudovu dəvət edir. Çünki filmin bəstəkarı Tofiq Quliyevin lirik mahnıları məhz belə bir müğənninin rola dəvət olunmasını tələb edirdi. Rəşid Behbudovun “Arşın mal alan” filmindəki uğuru onun özünü də kinoya bağlamışdı. Beləliklə, Rəşid Behbudov bu filmilə özünün yeni bir ekran triumfunu etmiş oldu.

Filmin əsas qəhrəmanlarından biri, Bəxtiyarın uşaqlıq dostu, sonralaar isə sevgilisi Saşa Verxovskayadır. Saşa bu filmdə əsas rollardan biridir və onu rus aktrisa  Tamara Çernova canlandırıb. Tamara Azərbaycan dilini bilmədiyindən onun rolunu Azərbaycanın məşhur aktrisası Sofa Bəsirzadə səsləndirib.

Beləliklə, budəfəki təqdimatımız Bəxtiyarın sevgilisi Saşa Verxovskayanı canlandıran rusiyalı aktrisa Tamara Çernova barəsindədir.

Tamara Aleksandrovna Çernova 1928-ci il yanvarın 2-də  Rusiyanın Sverdlovsk şəhərində (indiki Yekaterinburq) Sverdlovskda partiya işçisi ailəsində anadan olub. Atası Aleksandr Çernov partiya işçisi, anası Anastasiya isə maliyyəçi olub. Ailədə 3 qız uşağından biri olan Tamaranın Viktoriya adlı əkiz bacısı və Klara adlı böyük bacısı var idi. 

Tamaranın 13 yaşı olanda Böyük Vətən Müharibəsi başlayıb. Çoxsaylı müharibə uşaqları kimi bu azyaşlı qız da zavodda fəhlə işləyib, hospitalda növbətçi olub. 
Müharibə qurtarandan sonra  onun atasını dağılan şəhərin bərpası üçün Kiyevə göndəriblər. Onunla birlikdə bütün ailəsi – həyat yoldaşı və üç qızı da bura gəlib. Orada, Ukraynanın paytaxtında gənc Tamara Lesa Ukrainka adına Kiyev Rus Teatrı yanında teatr studiyasına daxil olub. 1947-ci ildə təhsilini başa vuraraq, Leninqrada yollanıb. Bəxti burada da gətirib – o, Leninqrad Teatr İnstitutunun aktyorluq fakültəsinə (Boris Zonanın kursuna) qəbul olub. Bir il sonra Tamara kinoda ilk debütünü edib. 

Beləcə, onun aktrisalıq karyerası başlayıb.

Rejissor Konstantin Yudin onu “Qoçaq adamlar” hərbi dramında baş rola təsdiq edib. 1950-ci ildə filmlərin çox az çəkildiyi dövrdə ekranlara çıxan film böyük tamaşaçı auditoriyası toplayıb. Aktrisalığa yenicə başlayan Tamara Çernova bir göz qırpımında inanılmaz populyarlıq qazanıb. Həmin il Tamara ailə qurur. Gənc aktrisa həmin vaxt teatrda kostyum üzrə rəssam işləyən Konstantin Savitsiyə ərə gedib. Bu ərəfədə digər rejissorlardan təkliflər gəlsə də, o imtina edib. Çünki aktrisa tezliklə ana olacaqdı və bu səbəbdən də yeni filmlərdə çəkilmək təkliflərinə razı olmurdu. Az sonra onun bir qızı dünyaya gəlib.
“Qoçaq adamlar” filminin təqdimatından sonra o, Moskva Bədii Akademik Teatrının məktəb-studiyasının ikinci kursuna qəbul olunur. Buranı 1953-cü ildə bitirdikdən sonra Mossovet adına Teatrın truppasında fəaliyyətə başlayır. 

Tamara 1955-ci ildə yenidən kinoekranlarda görünüb. O, Azərbaycanda çəkilən “Sevimli mahnı” (“Bəxtiyar”)  melodramında Saşa Verxovskaya rolunu ifa edir. 1955-ci ildə "Bakı kinostudiyası"nın çəkdiyi filmdə Saşa rolunu ifa edən Tamara Rəşid Behbudovun tərəf müqabili olur.

Daha sonralar o, idman dramı olan “Gəncliyə səyahət”də Marina Nazarova rollarına çəkilib. Tamaranın kinodakı digər rolları “İki günlük möcüzə” əfsanəsində cadugər qadın Marfa Petrovna (1970), “Üç bilinməyən tapşırıq” detektivində Şustova (1979), tarixi-bioqrafiya filmi olan “Sizinlə yenə mənəm...”də (1981) Natalya Qonçarova, “Müdafiəçi Sedov” (1988) sosial-psixoloji dramında Mariya Antonovna rollarına çəkilib. 

Tamara Çernovanın ailə həyatında uğursuzluq baş verir və o, həyat yoldaşından ayrılır.  90-cı illərdə aktrisa ikinci dəfə ərə gedir. Tamara Çernova vəkil Boris Bruşteynə ərə gedir və 10 il birgə yaşayırlar. 
Tamara Çernova 1991-ci ildə ayağındakı və ürəyindəki problemlərə görə teatrdan uzaqlaşmaq məcburiyyətində qalıb. Bu müddətdə o, günlərini nəvəsi ilə keçirməli olur. 
1998-ci ildə aktrisa uzun fasilədən sonra  “Bədbəxt Liza” serialına çəkilməklə yenidən kino ekranında görünüb.

Rusiyanın bəzi tanınmış kino xadimləri kimi Tamara Çernova da 90-cı ilin sonunda vətənini tərk edərək Amerikaya köçür. Rusiyanın əməkdar artisti, 86 yaşlı keçmiş aktrisa hazırda da ABŞ-da nəvəsi ilə yaşayır.