Xeberle.com olaraq bu suallarla teatrın direktoru İslam Həsənova müraciət etdik. O bildirdi ki, hazırda teatrda 18 tamaşanın oynanılması nəzərdə tutulub: "Bu mövsüm üçün 18 tamaşadan başqa, 4 tamaşa da hazırlanır. Yəni il boyu teatrda 22 tamaşa oynanılacaq. Teatrımızda M.F.Axundzadənin "Hacı Qara", "Müsyo Jordan və Dərviş Məstəli şah”, Turqut Özakmanın "Ocaq", Con Patrikin "Qocanı öldürməli", Kamran Nəzirlinin "Narkoman" və d. tamaşaları təqdim edirik. Bunlardan başqa uşaqlar və əsgərlər üçün də tamaşalar hazırlayıb oynayırıq. Əlavə olaraq Hacıqabul və Kürdəmirə qastrola gedəcəyik. Təzəlikcə isə Qubada tamaşa oynayıb gəlmişik.

Sentyabrın 22-də yeni mövsümün açılışı oldu

Yeni mövsümün açılışını Turqut Özakmanın "Ocaq" tamaşası ilə etdik. Ondan sonra teatrda 6 tamaşa oynanılıb. 5 tamaşa isə böyüklər üçün göstəriləcək.

Tamaşaların vaxtları əvvəlcədən tamaşaçılara bildirilir, saytımız və facebook səhifəmiz vasitəsilə. Bundan başqa DTV-də, Lider və AzTV-də tamaşalarımızla bağlı elanlar gedir. Afişalar üçün əlavə olaraq 2 tumba da gətirəcəyik ki, onları şəhərin müxtəlif yerlərində qoyaq.

Sumqayıt ən çox tədbir keçirilən şəhərlərdən biridir

Sumqayıt teatrı çox məhsuldar işləyir. Teatr təzə təmirdən çıxıb və bəzi şeylər var ki, onları qaydasına qoymalıyıq. Doğrusu, çətinliklər olur, ancaq işləri elə qururuq ki, çatdıraq. Sumqayıt bilirsiniz ki, Azərbaycanda ən çox tədbir keçirilən şəhərlərdən biridir. Biz də bu tədbirlərdə yaxından kömək edirik. Ayın 8-də Bayraq gününü qeyd elədik ki, Bakıdan sonra ən böyük tədbir bizdə oldu. Bizim boş vaxtımız olmur. Sumqayıt teatrı çox məhsuldar işləyir.

Qiymətlər 2, 3, 5 manat aralığında olur və tamaşalara görə fərqlənir. Bölgələrə gedəndə isə qiymət 5 manat qədərində müəyyən edilir. Yaxın müddətdə "Ocaq" tamaşasının bölgələrə səfəri olacaq.

Ziyalılar nə deyir?

Maraqlıdır Sumqayıt ziyalıları son dəfə teatra nə vaxt gedib? Suala cavab tapmaq üçün bir qisim Sumqayıt ziyalısı ilə əlaqə saxladıq.

Azərbaycan Yazıçılar Birliyinin Sumqayıt şəhər şöbəsinin sədri Gülnarə Cəmaləddin:

"Axırıncı dəfə sentyabrın sonlarında T.Özakmanın "Ocaq" tamaşasının premyerasına dəvət alıb getmişdim və çox bəyənmişdim. Əvvəllər vaxt olurdu tez-tez gedirdim, ancaq indi gedə bilmirəm".

Respublikanın əməkdar müəllimi, "Şöhrət” ordenli, "Araz” ali ədəbi mükafatı laureatı, "Sevil Qadınlar Cəmiyyəti” Sumqayıt şəhər təşkilatının sədri Ofelya Babayeva:

"Son dəfə teatr mövsümünün açılışı ilə bağlı olaraq "Ocaq" tamaşasına getmişəm. Ondan lap əvvəllər çox tamaşalara baxmışam".

Şair, Həmkarlar Ittifaqı Sumqayıt şəhər Kоmitəsinin və Respublika Mədəniyyət Fоndu Sumqayıt şöbəsi idarə Heyətinin sədri Əşrəf Veysəlli:

"Son vaxtlar səhhətimlə bağlı olaraq teatra gedə bilmirəm".

Əməkdar jurnalist Eyruz Məmmədov:

 "Son dəfə teatra "Ocaq" tamaşasına getmişəm. Maraqlıdır və imkan olduqca getməyə çalışıram".

Şair, "Göyərçin” jurnalının baş redaktoru Rafiq Yusifoğlu:

"Vallah yadıma düşmür. İmkanım və vaxtım olmur ki, son vaxtlar gedim. Ancaq, əvvəllər getmişəm".

Hicranə İsmayılova

Xeberle.com

P.S. Sakinlər arasında apardığımız sorğunu ümumiləşdirsək deyə bilərik ki, Sumqayıt teatrı ənənələri olan teatrdır. Burada nəinki əvvəlllər, elə indinin özündə də çox dəyərli yaradıcı insanlar fəaliyyət göstərir. Ancaq son dövrlər teatrda sanki bir süstlük var. Yeni maraqlı tamaşalar barmaqla sayılası qədərdir. Üstəlik tamaşaların təbliğatının aşağı səviyyədə olması repertuar və afişa seçiminin qənaətbəxş olmaması şəhər əhalisinin teatrallaşmış kəsiminin haqlı iradına səbəb olur.

Tamaşalar haqqında məlumatlar verilsə də, Sumqayıt Dövlət Dram Teatrının saytında və Facebook səhifəsində aylıq repertuar teatrsevərlər üçün təqdim olunmur.

Ümid edək ki, teatr rəhbərliyi insanların mədəni tələbatını ödəmək üçün vacib olan tamaşaların zənginliyini artıracaq, eyni zamanda təbliğat işini də gücləndirəcək.