Sumqayıt Regional Mədəniyyət və Turizm idarəsinin
təşəbbüsü, C.Cabbarlı adına Mədəniyyət evinin təşkilatçılığı ilə Sumqayıt şəhər
Poeziya Evində Respublikanın Əməkdar artisti Mehriban Xanlarova ilə görüş
keçirilib.
Xeberle.com-a daxil olan məlumata görə, görüşdə
sənətçinin dostları Respublikanın Əməkdar artisti Ruhəngiz Musəvi, müğənni
Sevda Kazımova, aktrisa Xatirə Süleymanova iştirak ediblər.
Əliağa
Tapdığın aparıcılığı ilə keçən görüşdə əvvəlcə Mehriban Xanlarovaya həsr
olunmuş videoçarx və Sumqayıt sakinləri ilə aparılan müsahibələr izlənilib.
Tədbiri
giriş sözü ilə açan Sumqayıt Regional Mədəniyyət və Turizm idarəsinin əməkdaşı
Arif Vəliyev qonaqları idarə rəisi Mehman Şükürovun adından salamlayaraq xoş
arzularını çatdırıb. Sonra Mehriban Xanlarova çıxış edib. Sumqayıtlılarla
görüşdən məmmunluq duyduğunu bildirən sənətçi tamaşaçılarla xoş ünsiyyət qurub,
sənətə gəlişi, səhnədə yaratdığı obrazlar, gənclik illəri ilə bağlı
xatirələrini bölüşüb.
"Sənətçiləri yaşadan tamaşaçı təbəssümü və alqışlarıdır”
deyən aktrisa belə görüşlərin sənət adamları üçün əhəmiyyətindən danışıb. Qonaqlar Ruhəngiz Musəvi, Sevda Kazımova, Nizami Nikbin şən mahnıları ilə tədbirə xoş
ovqat qatıblar.
Daha sonra
Xatirə Süleymanova, yazıçı Almaz Əliyeva və C.Cabbarlı adına mədəniyyət evinin
direktoru Aygün Qəhrəmanova çıxış edərək Mehriban Xanlarovanın insani
keyfiyyətlərindən, tamaşaçı sevgisindən danışıb, belə görüşlərin davamlı
olacağını bildiriblər.
Sonda
sənətçi tamaşaçıların suallarını cavablandırıb, xatirə şəkilləri çəkdirib.
Xəbərdən istifadə edərkən istinad etmək vacibdir.
