Ələsgər İbrahimov... Yəqin bu ad sizə heç nə demədi. Ancaq "Yeddi oğul istərəm”in "Zalımoğlu”su desəm, bir çoxunuz xatırlayacaqsız. Əslində, xatırlamamaqda haqlısız. Ona görə ki, Ələsgər cəmi 37 il yaşayıb və haqqında çox az məlumat var. Əldə etdiyimiz məlumatlardan isə belə məlum olur ki, çox çətin, faciəli həyat yaşayıb.
O, 1942-ci ildə "İçərişəhər”də dünyaya gəlmişdi. Azərbaycan Neft və Kimya İnstitutuna (AzNKİ, indiki Azərbaycan Dövlət Neft və Sənaye Universitetinə (ADNSU)) girmişdi. Kinoya gəlişi də təsadüfən olmuşdu. Kinorejissor Arif Babayev ilə qonşuydular. Onun yaraşıqlı siması, boy-buxunu rejissorun da diqqətini cəlb etmişdi. O zamanlar bu cür görünüşlü aktyorlara ehtiyac olduğuna görə, Arif Babayev onu kinostudiyaya dəvət edir. Kinostudiyada işləyə-işləyə Adil İsgəndərovun kino aktyorluğu kursuna da yazılır. Çox keçmir, Arif Babayev Ələsgər İbrahimovu "İnsan məskən salır” filminin çəkilişlərinə çağırır. Bu, onun ilk filmi olur. Sonralar Adil İsgəndərovun da rəğbətini qazanan aktyor "Torpaq, dəniz, od, səma”, "Arxadan vurulan zərbə” kimi filmlərə çəkilir. Ancaq hər kəs onu "Yeddi oğul istərəm” filmindəki "Zalımoğlu” obrazı ilə tanıyır və sevir. Elə bu obrazla da həm kino tariximizdə, həm də insanların yaddaşında öz izini qoyur. Təəssüf ki, onun bu sürətli yüksəlişi çox çəkmir. Sevdiyi qızla münasibətlərinin pozulması onu gənc yaşda içki düşkünü edir. Vəziyyət o yerə çatır ki, ən xırda problemlərlə də qarşılaşanda içkiyə üz tutur. Özünü sanki bilə-bilə məhkum etdiyi tənhalığını yalnız göyərçinləri ilə bölüşür. Bu halı ətrafındakı insanları da incidir. Onu hər gün içki şüşələrinin arasında tapırlar. Bu özünəqəsd onu ən ağır xəstəliyə - çənə xərçənginə düçar edir. Dostları yenə onu tək qoymur. Xalq artisti Rafiq Əzimov bizə müsahibəsində demişdi: "Bu bizim hamımızın yaralı yeridir, onun ölümü bizi məhv etdi. Biz onu "Yeddi oğul istərəm”dən qabaq başqa filmlərdən tanıyırdıq. Çox yaraşıqlı oğlan idi. O vaxt İçərişəhərdə 3-4 yaraşıqlı oğlan var idisə, biri də Ələsgər idi. Filmdən sonra daha yaxın olmuşduq. Bir müddət sonra xəstəliyə tutuldu. Onu görmək üçün yanına getdik. Mən onu görəndə inanmadım, o cür boy-buxunlu, yaraşıqlı adam çox pis halda idi. Hətta ağlamaq tutdu məni. Ağır xəstəliyə tutulmuşdu. Sonralar necə oldu bilmədik. Çünki "Yeddi oğul istərəm”dən sonra hər il bir filmə çəkildik. Başımız qarışdı çəkilişlərə, bir də xəbər tutuq ki, Ələsgər artıq həyatda yoxdur. Bu bizə çox pis təsir etmişdi...”
Beləcə, Ələsgər İbrahimov 37 yaşında heç kimin xəbəri olmadan qeybə çəkilir. Onun üçün heç yas mağarı da qurulmur. Harda dəfn olunduğu da bilinmir.
Bildiyimiz tək şey budur ki, sevdiyi qız ondan sonra ailə qurmayıb. Hazırda tanınmış xanım bəstəkarlarımızdan biridir. Hətta xalq artistidir. Adının sirr qalmasını istəyir. Yalnız o Ələsgərin qəbrini ziyarət edir, danışır, gülür, ağlayır və deyir ki, 37 yaşda da ölərlərmi, ay Zalımoğlu?

 

 

 

 

 

 

Xəbərdən istifadə edərkən istinad etmək vacibdir.