1980-ci illərin əfsanəvi "OZAN” muğam-rok qrupunun yaradıcısı və rəhbəri, "Rekviem”, "Pəncərə”, "Sən getdin”, "Batmış gəminin mahnısı” və digər tanınmış musiqi əsərlərinin müəllifi, ötən əsrdə Azərbaycanda ilk qeyri-formal ictimai təşkilat kimi milli-azadlıq hərəkatının fəal iştirakçılarından biri olan "CƏNGİ” birliyinin yaradıcısı və rəhbəri olmuş, o dövrdə Azərbaycan Dövlət Televiziyasında "Ekspromt” və "Çərşənbə axşamı” verilişlərinin, 2006-2007-ci illərdə isə ANS televiziya kanalında "CƏM” ictimai-siyasi tok-şousunun müəllifi və aparıcısı olmuş, Lomonosov adına Moskva Dövlət Universitetinin fəlsəfə fakültəsinin məzunu, Fəlsəfə elmləri namizədi, dosent, hazırda AMEA-nın sosiologiya elmləri üzrə doktorantı və yeni yaranmış "Quran nəşrləri” nəşriyyatının direktoru, tanınmış bəstəkar-şair və naşir Rasim Müzəffərli yeni mükafat qazanıb. O, Macarıstanın "Pro Cultura Hungarica" mükafatını alan ilk azərbaycanlı olub.
Xeberle.com məlumat verir ki, R.Müzəffərli macar dramaturqu İmre Madaçın (1823-1863), demək olar ki, bütün Avropa dilləri də daxil olmaqla, 40-dan çox dilə tərcümə olunmuş "İnsanın faciəsi" poetik dram əsərinin Azərbaycan dilinə tərcüməsinə görə Macarıstanın Milli mükafatına layiq görülüb. Macar mütəxəssislər qeyd edirlər ki, "İnsanın faciəsi" əsərinin Azərbaycancası mükəmməl tərcümələrdən biridir və bəlkə də birincisidir.
Azərbaycan dilində "İnsanın faciəsi" kitabı 2017-ci ildə Macarıstan hökumətinin sifarişi ilə tərcümə edilmiş və "1001 kitab" nəşriyyatı tərəfindən nəşr olunmuşdur. Keçən il Bakıda Macarıstanın birinci xanımının iştirakı ilə Mərkəzi Elmi Kitabxanada kitabın təqdimatı keçirilmişdir.
Saytımıza açıqlama verən Rasim Müzəffərli qeyd edib ki, mükafatın təqdimatı hələ olmayıb:
"Bu haqda Macarıstan mətbuatında məlumat yayılıb. 2017-ci ilin yekunları üzrə üç mükafatçı elan olanub ki, onlardan biri də mənəm. Bu il mənim 60 yaşım tamam olur. Macar dostlarım deyirlər ki, çox güman, mükafatın təqdimatı ad günümlə əlaqələndiriləcək. Mənim üçün əsas olan zəhmətimə verilən dəyərdir."
Rasim Müzəffərli həmçinin 10 fevral 2017-ci ildə Sumqayıt şəhərində baş tutacaq görüşündən də danışıb:
"2016-cı ildə də Sumqayıtda, "NEXT" Mərkəzində, nisbətən dar çərçivədə görüşümüz olmuşdu. Çox sağ olsunlar ki, bəyəniblər və daha geniş şəkildə görüş planlaşdırıblar. Sabahkı görüşə söhbət də, dialoq da demək olar. Düşünürəm ki, mənim gənclərə deyə biləcəyim çox şeylər var və istəmirəm ki, bildiklərimi özümlə aparım."
Qeyd edək ki, bəstəkar-şair, filosof və naşir Rasim Müzəffərli ilə 10.02.2018 tarixdə saat 15:00-da Sumqayıt Gənclər Evində görüş keçiriləcək. Görüş "Next Tuition Centre", Sumqayıt Şəhər Gənclər və İdman Baş İdarəsi və Sumqayıt Gənclər Evinin birgə təşkilatçılığı ilə baş tutacaq.
İştirak etmək üçün aşağıdakı linkdən qeydiyyatdan keçmək lazımdır:
https://docs.google.com/forms/d/e/1FAIpQLSd4pTbNPrCsW2DFe8I6YoCrDydw1pOko0_pLjwSnZ7J_NFSrg/viewform
Hicranə İsmayılova
Xeberle.com
Xəbərdən istifadə edərkən istinad etmək vacibdir.
