Heydər Əliyev adına Sarayda Şərq nağılı motivləri əsasında hazırlanan "Ələddin” musiqili tamaşasının premyerası keçirilib.

Xeberle.com-un verdiyi məlumata görə, sağlamlığı məhdud olan uşaqlar üçün keçirilən xeyriyyə tamaşası maraqlı anlarla yadda qalıb. Əfsanəvi Məğrib şəhərində sevib-sevilmək arzusu ilə min bir xəyal quran şahzadə Yasəmənin evdən qaçması , ilk baxışdan məhəbbət, təsadüfən mağaradan tapılan çıraq, Cinin köməyi ilə yalan danışan Ələddinin başına gələnlər və bir-birini əzəv edən həyəcanlı səhnələr tamaşaçılar tərəfindən alqışlarla qarşılanıb. Əsərin əsas idealarından biri də Cinin köməyi ilə üç arzusuna çatan Ələddinin xəyanətkar vəziri, yəni Cəfəri əbədi çıraqda dustaq etmklə sultanı və şəhər sakinlərini böyük bir bəladan qurtarması olub. Balaca tamaşaçılar həmçinin Cini ədəbi azadlığa buraxmaqla üçüncü arzusuna çatan və hər zaman olduğu kimi qalacağına söz verən Ələddin obrazını səmimi qəhrəman kimi yüksək qiymətləndiriblər. Məlumat üçün bildirək ki, saf sevgi, etibar, dostluq hisslərinin xəyanət və nifrət üzərində qələbəsini əks etdirən əsərin quruluşçu rejissoru Azərbaycan Respublikasının Əməkdar artisti İnarə Babayeva, redaktoru Emin Həsənov, tərcüməçi redaktoru Leyla Qədirzadə idi. Tamaşanın əsas qəhrəmanlarından biri olan Ələddin obrazını Zamiq Hüseynov, Yasəməni Sevda Yəhyayeva, Emiliya Yaqubova, Cin rolunu isə Hüseyn Abdullayev təqdim ediblər. Əsərdə digər obrazlardan biri olan Sultanı Ələkbər Əliyev, Cəfəri Hüseyn Əlili, Yaqonu Tofiq Hacıyev , Rəsulu isə Nicat Əli canlandırıblar.

Qeyd edək ki, tamaşanın musiqili rəssamı Fərid Nəcəfli, xormeysteri Şəhla Ələkbərova, baletmeysterləri isə Vahid Səlimov və Rasita Əliyeva idi.