Xeberle.com-un verdiyi məlumata görə, bu sahədə ilk fəxri ad alan şəxslər Sumqayıt şəhər Mədəniyyət şöbəsinin sabiq müdiri Tamara  Həsən qızı Rəsulova ("Əməkdar mədəniyyət işçisi”, 1968-ci il) və Səməd Vurğun adına Mədəniyyət sarayının sabiq direktoru Çingiz Qədirov ("Əməkdar mədəniyyət işçisi”, 70-ci illər) olublar.

Mədəniyyət sahəsində verilən ən böyük fəxri adlara isə ilk dəfə Sumqayıt şəhərinin Baş rəssamı Vaqif Nəzirov ("Əməkdar incəsənət xadimi”) və Sumqayıt şəhər Mədəniyyət şöbəsinin sabiq müdiri Zərifə Təhməzova ("Azərbaycan Respublikası Prezidentinin fərdi təqaüdü”) layiq görülüblər. Bundan başqa "Əməkdar Mədəniyyət işçisi” fəxri adına layiq görülənlər sırasında Sumqayıt Regional Mədəniyyət İdarəsinin rəisi  Mehman Şakir oğlu Şükürov, Mədəniyyət İşçiləri Müstəqil Həmkarlar İttifaqı Sumqayıt şəhər Komitəsinin sabiq sədri Əşrəf Cavad oğlu Şəfiyev, Sumqayıt şəhəri Tarix Muzeyinin direktoru Olya Zəbi qızı İslamovanı  və s. göstərmək olar.

Qeyd edək ki, mədəniyyətin inkişaf etdirilməsində göstərdiyi xidmətlərə görə bir sıra şəxslər "Əməkdar incəsənət xadimi” fəxri adı ilə yanaşı "Tərəqqi” medalı ilə də təltif olunublar.

Bu şəxslər sırasında Sumqayıt şəhər Mərkəzləşdirilmiş Kitabxana Sisteminin direktoru Yeganə Əhmədiyyə qızı Əhmədova, Sumqayıt şəhərinin Tarixi Muzeyinin direktoru  Olya Zəbi qızı İslamovanı və s. adını çəkmək olar.