Xırdalandakı Heydər Əliyev adına mədəniyyət və istirahət parkında yay mövsümündə insanların asudə vaxtlarının səmərəli keçirilməsi məqsədilə Sumqayıt Regional Mədəniyyət İdarəsi və Abşeron Rayon İcra Hakimiyyətinin birgə təşkilatçılığı ilə aşıq sənətinin inkişafına həsr edilən "Dostluq körpüsü” adlı konsert proqramı təqdim olunub. Konsertdə Aşıq Şəmşir Mədəniyyət Ocağı İctimai Birliyinin və Azərbaycan Aşıqlar Birliyi Sumqayıt bölməsinin nümayəndələri də iştirak ediblər.
Tədbirdə milli sərvətimiz olan saz sənətinin qorunub saxlanılmasında, gələcək nəsillərə çatdırılmasında görülən genişmiqyaslı işlərdən söz açılıb. Qeyd edilib ki, Azərbaycan mədəniyyətinə, elminə, sözünə, sazına xidmət göstərmiş Dədə Şəmşir və onun ustadı olmuş Dədə Ələsgər bu gün xalqımızın ürəyində yaşayır.
Azərbaycan Aşıqlar Birliyi Sumqayıt bölməsinin, Xırdalan, Ceyranbatan, Mehdiabad musiqi məktəblərinin və Abşeron rayon Mədəniyyət Mərkəzinin aşıqları çıxış edərək, saz havaları üstündə Dədə Şəmşirin şeirlərini səsləndirib, ustadın yazdığı əsərləri, bir-birindən zəngin saz havalarını ifa edərək, tədbirə toplaşanların zövqünü oxşayıblar.
İki hissədən ibarət olan tədbirdə dekorativ təsviri və xalq tətbiqi sənət ustalarının iştirakı ilə satış-sərgi də keçirilib. Abşeronlu sənətkarların hazırladıqları müxtəlif əl işləri sakinlərin böyük marağına səbəb olub.
Xəbərdən istifadə edərkən istinad etmək vacibdir.
