Sumqayıt Regional
Mədəniyyət idarəsinin dəstəyi ilə Sumqayıt şəhər Heydər Əliyev Mərkəzində Səməd
Vurğun adına Mərkəzi Kitabxananın Uşaq şöbəsinin təşəbbüsü və təşkilatçılığı
ilə "Beş tarixin bir ünvanı” adlı tədbir keçirilib.
Bu ad özündə beş önəmli və əlamətdar
tarixi ehtiva edib. Belə ki, Mərkəzi Kitabxananın uşaq şöbəsinin 50 illiyi
fonunda eyni zamanda "Nəsimi – 650”, "Cəlil Məmmədquluzadə - 150”, "Cəfər
Cabbarlı – 120” "Sumqayıt – 70” kimi əlamətdar məqamlara da işıq salınıb.
Tədbir balaca oxucuların xüsusi
hazırladıqları mahnı təbriki ilə başlandı. Sabir Sarvan adına Poeziya klubunun
üzvləri uşaq şöbəsinin əməkdaşlarının parodiyası ilə ilk səhnəciyi təqdim
etdilər.
Aparıcı, yazıçı – ssenarist, kultroloq
Hafiz İmamnəzərli beş tarixin bir məqamında cəmləşdirilməsinin təsadüfi
olmadığını dilə gətirdi. Natiq bildirdi ki, kitabxana zəka evi, bilik
mənbəyidir və hər şey məhz kitabxanadan keçir. Eyni zamanda Nəsimi, Mirzə
Cəlil, Cəfər Cabbarlı, Sumqayıt və Mərkəzi Kitabxananın Uşaq şöbəsini
birləşdirən bir mənəvi dəyər var: həqiqət!
Proqram boyunca beş tarixin məqamlarını
əks etdirən nümunələr təqdim olundu. Sevda Mirzəyeva Nəsiminin "Dünya duracaq
yer deyil " qəzəlini, İsmayıl Hüseynov
və Nihad Bədəlli Cəfər Cabbarlını "Şair və artist ” satirasını söylədilər.
Aynur Kərimova, Mirkənan və Lətifə Mahmudovalar, Cavidan Mirzəzadə, İsmayıl
Hüseynov ədibin "Yaylağa gedir” pyesini,
İsmayıl Hüseynov və Cavidan Mirzəzadə Rafiq Yusifoğlunun " Sumqayıtın
nağılı” şeirinin səhnə versiyasını göstərdilər.
"Kimyaçı” Mədəniyyət Sarayının "Kimyaçı”
instrumental ansambılının və rəqs kollektivinin üzvləri tədbirə özgə hava
qatdılar.
Sonda Mərkəzi Kitabxananın Uşaq Şöbəsinin
müdiri Yeganə Hüseynova qonaqlara təşəkkürünü bildirdi və kitabxanaçı peşəsi
ilə qürur duyduğunu söylədi.
Xəbərdən istifadə edərkən istinad etmək vacibdir.
