O, bu sənətin sirlərini gənclərə də aşılayır. Sumqayıtda bir çox sərgiləri də olub. Aktivliyi ilə də seçilir.
Söhbət rəssam Nəsibə Şükürovadan gedir.
N. Şükürova Xeberle.com informasiya portalının və Sumqayıt Regional Mədəniyyət İdarəsinin Sumqayıt Dövlət Rəsm Qalereyasının birgə həyata keçirdiyi "BAX!ş" adlı rəsm sərgisinin qaliblərindən biridir. O, sərgidə "Haqqa doğru”" adlı əsərlə iştirak edib və sosial şəbəkə izləyicilərinin əksəriyyətinin səsini qazanaraq qaliblərdən biri olub.
N. Şükürova 1979- cu ildə İsmayıllı rayonunda anadan olub. 1994- 1998- ci illərdə Əzim Əzimzadə adına Azərbaycan Rəssamlıq Texnikomunun "Teatr Dekorasiya Sənəti” fakültəsini, 1999 - 2003-cü illərdə Azərbaycan Dövlət Rəssamlıq Akademiyasının Keramika fakültəsinin bakalavr, daha sonra isə magistr pilləsini bitirib. 2014-cü ildən Azərbaycan Dövlət Rəssamlıq Akademiyasının dissertantıdır. 1998- ci ildən Sumqayıt şəhər Hacı Zeynalabdin qəsəbəsində Ə.Bakıxanov adına Uşaq İncəsənət Məktəbində, 2012-2014-cü illərdə paralel olaraq Azərbaycan Rəssamlıq Akademiyasında müəllim işləyib. 2011-ci ildən Azərbaycan Rəssamlar İttifaqının üzvüdür. 2016-cı ildə "Fəxri Mədəniyyət işçisi” adı ildə təltif olunub.
Şükürova rəssamlıqla yanaşı, bədii keramika ilə də məşğul olur.
Bədii keramika Azərbaycanda sənətkarlığın ən qədim sahələrindən biri olub və bu gün də peşəkar sənətkarlarımız tərəfindən inkişaf etdirilməkdədir. Nəsibə Şükürova keramikadan müxtəlif dekorativ əl işləri hazırlayır.
Ali təhsilini rəssamlıq sahəsi üzrə alan Nəsibə xanım daha sonra keramika sənətinə meyl edərək bu sahənin bütün sirlərinə yiyələnir.
Böyük zövqlə hazırlanan bu məhsullar əsasən 3 üslubda təqdim olunur. Bunlar fəlsəfi fikirləri xarakterizə edən, gözəlliyin təbliği üçün yaradılmış əsərlər və ən əsası milli köklərə bağlı olan əl işləridir.
Sənətkar ruhlu bir ailədən böyüyən Nəsibə xanım qeyd edir:
"Anam uzun müddət xalçaçılıq sahəsi üzrə fəaliyyət göstərib. Düşünürəm anamın peşəkar bir xalçaçı olmasından ilhamlanaraq mən də sənətkarlıq sahəsində fəaliyyətimi davam etdirmişəm”.
Qeyd edək ki, Nəsibə Şükürova evində yaratdığı kiçib bir emalatxanada məhsulları hazırlayır və kiçik bir həcmdə bu məhsulları sata bilir.
O, "ABAD” ailəsinə də qoşulub. Qoşulmaqda məqsədi məhsullarını dünyaya tanıtmaq və mədəniyyətimizi təbliğ etmək olan Nəsibə xanım əl işlərini sənətkarlıq mərkəzlərimizdə satışa çıxarıb.
Xəbərdən istifadə edərkən istinad etmək vacibdir.
