İyunun 24-də Abşeron rayon Mədəniyyət Mərkəzində mədəniyyət müəssisələrinin rəhbərlərinin iştirakı ilə müşavirə keçirildi.

Müşavirəni giriş sözü ilə açan Sumqayıt  Regional Mədəniyyət İdarəsinin rəisi Rəşad Əliyev son illər mədəniyyətin inkişafı, milli-mənəvi dəyərlərimizin qorunması və təbliği məqsədi ilə ölkə rəhbərliyinin gördüyü işlərdən söhbət açaraq, Mədəniyyət Nazirliyi, həmçinin nazirliyin regional idarələri tərəfindən bu istiqamətdə davamlı tədbirlərin həyata keçirildiyini və bəzi həssas məsələlərin daim nəzarətdə saxlanıldığını qeyd etdi.

İdarə rəisi Sumqayıt Regional Mədəniyyət İdarəsinin tabeli incəsənət və uşaq musiqi məktəblərinin şagirdlərinin həm ölkə, həm də beynəlxalq səviyyəli müsabiqələrdə böyük nailiyyətlər qazanmasının qürurverici olduğunu bildirərək, gənc nəslin yaradıcılığa həvəsləndirilməsi, onların istedadının üzə çıxarılmasının vacibliyini müşavirə iştirakçılarının nəzərinə çatdırdı.

Daha sonra tədbirdə çıxış edən mədəniyyət işçiləri görülmüş işlər barədə məlumat verərək sahənin inkişafı ilə bağlı təkliflər irəli sürdülər.

Müşavirəyə yekun vuran Rəşad Əliyev Abşeron rayon mədəniyyət evlərinin və klubların fəaliyyətində bir sıra çatışmazlıqların mövcud olduğunu qeyd edərək, mədəniyyət müəssisələrinin səmərəli fəaliyyətinin qurulması, əhalinin mədəni həyatının təşkili sahəsində innovativ yanaşmaların tətbiqi, mədəni xidmətlərin səviyyəsinin daha da artırılmasının əhəmiyyətini xüsusi vurğuladı. Qeyd edilən məsələlərlə bağlı cari vəzifələrin müəyyənləşdirilməsi üçün tapşırıq və tövsiyələrini verib, irad və xəbərdarlıqlarını bildirdi.