Məlum COVID-19 pandemiyasının yaratdığı psixoloji vəziyyət, sosial məhdudiyyətlər rəssamların tariximizin bu zəfər və şərəf səhifəsini tabloya köçürmək həvəsinə təsir etməyib, onları ruhdan salmayıb. Artıq bir çox əsərlər hazır vəziyyətdə ziyarətçisini gözləyir.
AZƏRTAC xəbər verir ki, bu fikirlər Sumqayıt Regional Mədəniyyət İdarəsinin rəisi Rəşad Əliyevin şəhərdə çalışan bir qrup rəssamla görüşdə səslənib.
Sumqayıt Dövlət Rəsm Qalereyasında reallaşan görüşdə Azərbaycan çağdaş təsviri sənətinin inkişafı, rəssamların zəfər sərgisinə hazırlıq vəziyyəti, onların yaradıcılıq axtarışları, üslub özəllikləri, orijinal ideyalarını sənət sevənlərə təqdim etmək, ictimaiyyətlə əməkdaşlığı daha da genişləndirmək məsələləri geniş müzakirə olunub. Maraq doğuran ideyalar, təkliflər diqqətə alınıb. Rəssamların aktiv məşğulluğu, daimi iş yeri ilə təminatı gündəmə gəlib. Belə ki, mədəniyyət evlərində rəssamlıq dərnəklərinin açılışı və peşəkar rəssamların bu işə cəlb olunması həlli vacib məsələ kimi qeyd olunub.
Zəfər sərgisinə hazırlıq məsələsi görüşün leytmotivi kimi təkrarlanıb. Ermənistanın işğalçılıq siyasətini və faşizm ideologiyasını lənətləyən rəssamlar rəşadətli Qələbə günlərini xatırlayaraq bundan sonrakı yaradıcılığını zəfər mövzusuna həsr etmək niyyətini bildiriblər.
Müzəffər Ali Baş Komandanın, yenilməz Ordumuz, xalqımızın Vətənə və torpağa bağlılığı, milli maraq, dövlətçiliyi qorunması din və dil birliyimizin müqəddəs Qələbəmizdə oynadığı böyük rol kimi mövzuların rəssamların əsərlərində əksini tapacağı bildirilib.
