Azərbaycan Respublikasının Prezidenti İlham Əliyevin 2020-ci il 3 dekabr tarixli Sərəncamı ilə xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-i Azərbaycan Respublikasında Zəfər Günü kimi təntənəli şəkildə qeyd edilməsi qərara alınmışdır.
Xalqımızın vətənsevər təsviri və dekorativ tətbiqi sənət ustaları unudulmaz qələbədən ilhamlanaraq, məhz bu mövzuda sənət əsərləri yaratmaqdadırlar.
Zəfər Günü ərəfəsində Sumqayıt Regional Mədəniyyət İdarəsinin dəstəyi, Sumqayıt Dövlət Rəsm Qalereyasının təşkilatçılağı ilə "Zəfər Palitrası” adlı sərgi təşkil olunacaqdır.
Sərginin keçirilməsində məqsəd azad olunmuş ərazilərin füsunkar təbiətinin, mədəni irs nümunələrinin təsvir və tərənnümü, müzəffər Azərbaycan ordusunun 44 günlük Vətən müharibəsində göstərdiyi misilsiz qəhrəmanlıq və böyük tarixi zəfərin rəssamların peşəkarlığı və yaradıcılıq məharəti vasitəsilə təsviri və dekorativ-tətbiqi sənət əsərlərində nümayiş olunmasıdır.
Sərgi 2021-ci il noyabrın 5-də Sumqayıt şəhər Heydər Əliyev mərkəzində keçiriləcəkdir.
Sərgidə 18 yaşdan yuxarı yerli və xarici rəssamlar, heykəltəraşlar, təsviri və dekorativ tətbiqi sənət ustaları əsərləri ilə iştirak edə bilər:
İştirak qaydaları:
Sərgidə iştirak etmək üçün işlərin fotoları [email protected] elektron ünvanına göndərilməlidir.
Nümayiş ediləcək əsərin keyfiyyətli fotosu çəkilməli (2-5 mb), adı, ölçüsü, müəllifin adı , soyadı və ata adı qeyd olunmalıdır.
İştirakçı sərgidə nümayiş olunması üçün maksimum 2 əsər təqdim edə bilər.
Nümayiş üçün əsərlərin seçimində ideya orijanıllığı, peşəkarlıq və mövzuya fərqli baxış tərzi nəzərə alınacaq.
Əsərlər 31 oktyabr 2021 –ci il saat 18:00-dək Sumqayıt Dövlət Rəsm Qalareyasına təhvil verilməlidir.
Sərgidə iştirak edəcək təsviri və dekorativ tətbiqi sənət ustalarının siyahısı Sumqayıt Dövlər Rəsm Qalereyasının rəsmi saytı və sosial media hesablarında paylaşılacaq.
Nümayiş olunan əsərlərin müəllifləri diplomlarla təltif ediləcəklər.
Sərginin Nazirlər Kabineti yanında Operativ Qərargahın COVİD-19 pandemiyası ilə əlaqədar qəbul etdiyi karantin qaydalarına uyğun keçirilməsi planlaşdırılır.
Xəbərdən istifadə edərkən istinad etmək vacibdir.
