Gənclər və İdman Nazirliyinin dəstəyi ilə Bakı Uşaq Teatrı tərəfindən hazırlanmış "Həyatla oyun” tamaşası iki həftə ərzində Bakının 10 rayonunda nümayiş olunub.
Bakı Uşaq Teatrının mətbuat xidmətinin rəhbəri Leyla Həşimova müsahibəsində bildirib ki, QİÇS-in yaratdığı dəhşətlərdən bəhs edən tamaşa yüksək tərbiyəvi əhəmiyyət kəsb edir.
Vurğulayıb ki, teatrın "Həyatla oyun” tamaşası artıq 47 rayonda, 21 ali və 15 orta ixtisas məktəbində də nümayiş olunub.
Tamaşanın Səbail, Abşeron rayonlarında və Sumqayıt şəhərində nümayişi planlaşdırılıb. Mart ayının ilk həftəsində isə teatr "Həyatla oyun” tamaşası ilə 7 rayonda qastrol səfərində olacaq.
Narkomanlığa və narkotik vasitələrin qanunsuz dövriyyəsinə qarşı mübarizəyə həsr edilən tamaşanın müəllifi Arzu Soltan, rejissoru teatrın direktoru İntiqam Soltandır.
Əsasən 1 saat 15 dəqiqədən ibarət tamaşada hadisələr bir qrup tələbələr arasında cərəyan edir. (azertac.az)