Sumqayıt Regional Mədəniyyət İdarəsinə tabe olan Qubadlı rayon Tarix-Diyarşünaslıq muzeyində Qubadlı rayonunda yerləşən məscidlərin və tarixi abidələrin erməni işğalından sonra hal-hazırki vəziyyəti ilə bağlı tədbir keçirilib. Muzeyin direktoru Vaqif Babayev bildirib ki, Ermənistanın işğalçılıq siyasəti nəticəsində Azərbaycan xalqına məxsus çoxəsrlik qədim tarixi-dini abidələr, müqəddəs ocaqlar və məbədlər dağıdılaraq məhv olub, bəzilərinin üzərində saxtalaşdırma-erməniləşdirmə əlamətləri aşkar edilib. Bu dağıntılar Qubadlı rayonundan da yan keçməyib. Tədbirdə muzeyin kiçik elmi işçisi Günel Quluzadə məscid anlayışı və tarixi haqqında ümumi məlumat verib. Əməkdar müəllim Çingiz Salmanov "Qubadlı rayonun tarixi və məscidləri”, Sumqayıt Dövlət Universitetinin Baş müəllimi Elnarə Əhmədova "Qubadlı rayon məscidlərinə məxsus memarlıq və arxitektural əlamətlər”, Azərbaycan Respublikasının Mədəniyyət Nazirliyi yanında Mədəni İrsin qorunması, inkişafı və bərpası üzrə Dövlət xidmətinin Qubadlı rayon üzrə Baş mütəxəsisi Sədi Vəliyev "İşğaldan sonra Qubadlı məscidlərinin son vəziyyəti” barədə çıxışlar ediblər.
Xəbərdən istifadə edərkən istinad etmək vacibdir.
