Azərbaycanlı xanım rəssam Mehriban Əfəndinin "Gecənin mistikası” adlı əsəri "Effetto Arte” jurnalında nəşr edilib.
Jurnalın 2015-ci ilin yanvar nömrəsində "Sandro Botiçelli” adına mükafatın laureatı kimi onun haqqında informasiya dərc olunub.
Rəssam bildirib ki, o, bu mükafata onu 2014-cü ildə İtaliya incəsənət kuratoru Dt.Salvatore Russo tərəfindən beynəlxalq fəaliyyətinin və rəssamlıqda orijinal üslubun yaradıcısı kimi layiq görülüb.
Mükafat rəssama martın 1-də İtaliyanın Florensiya şəhərində Dante adlı muzeydə təqdim olunacaq.
Əfəndiyeva Mehriban (Mehriban Əfəndi) Ə.Əzimzadə adına Rəssamlıq Məktəbini bitirib. Yaradıcılığının elə ilk dövrlərindən sürrealist cərəyanının təmsilçisi kimi özünü göstərib. 2005-ci ildə ABŞ-da fərdi sərgisi açılıb. 2010-cu ildə M.Əfəndi həm də Bolqarıstanda keçirilən "Radiance” müsabiqəsinin iştirakçısı olan 22 ölkədən 123 rəssam arasında qalibi elan olunub. O, Avropa və Amerika ölkələrində təşkil olunan bir sıra qrup sərgilərinin iştirakçısı olmaqdan savayı Avstraliya və Amerikada fərdi sərgilərini açıb.  (anspress.com)