Sumqayıt Şəhərinin Tarixi Muzeyində Sumqayıt Regional Mədəniyyət İdarəsinin rəisi Rəşad Əliyevin iştirakı ilə tabeli müəssisə rəhbərlərinin müşavirəsi keçirilib.
Sumqayıt Regional Mədəniyyət İdarəsindən Xeberle.com-a bildirilib ki, tədbirdə yeni iş mövsümünün və tədris ilinin başlanması münasibətilə müşavirə iştirakçılarını təbrik edən İdarə rəisi Mədəniyyət Nazirliyinin rəhbərliyi tərəfindən keçirilən müşavirə zamanı regional idarələrin rəislərinə verilən tövsiyə və tapşırıqları müəssisə rəhbərlərinin diqqətinə çatdırıb.
Müşavirədə artıq cari ildən hər bir müəssisənin iş effektivliyinin Əsas Effektivlik Göstəriciləri (KPİ) üzrə dəyərləndiriləcəyi bildirilib. Müəssisələrin qarşısına qoyulan məqsəd və hədəflərə çatma dərəcəsinin müəyyən edilməsi üçün aparılacaq monitorinq və təhlillərdən, bu müddət ərzində görülmüş işlərdən, nöqsan və çatışmazlıqlardan danışılıb.
Rəis mədəniyyət müəssisələrinin fəaliyyətinin müasir dövrün tələbləri əsasında qurulması, tabeli müəssisələrdə işə davamiyyət, şəffaflıq və səmərəliliyin artırılması, təcrübə mübadiləsinin aparılması və digər aktual məsələlərə diqqətin artırılmasının vacibliyini vurğulayıb.
Bütün dünyada olduğu kimi, ölkəmizdə də sosial şəbəkələrə marağın gündən-günə artdığını bildirən R.Əliyev bu kontentlərin dövlət səviyyəsində yüksək qayğı ilə əhatə olunan Azərbaycan mədəniyyətinin təbliğinə geniş imkanlar açdığını qeyd edib. O, həmçinin bütün müəssisələrdə mətbuatla işin təkmilləşdirilməsi, sosial şəbəkələrin imkanlarından düzgün istifadə etməklə maarifləndirmə və təbliğat fəaliyyətinin sistemli və əlaqəli şəkildə həyata keçirilməsi ilə bağlı tapşırıq və tövsiyələrini verib.
Xəbərdən istifadə edərkən istinad etmək vacibdir.
