Sumqayıt şəhər Poeziya evində Sumqayıt Regional Mədəniyyət İdarəsinin dəstəyi ilə, idarəyə tabeli N.Nərimanov adına Mədəniyyət Mərkəzinin "Dostluq” mədəniyyət evinin hazırladığı "Onlar bir incidir” adlı layihə baş tutdu. Tədbiri giriş sözü ilə açıq elan edən Sumqayıt Regional Mədəniyyət İdarəsinin rəisi Rəşad Əliyev qonaqları salamlayaraq, Vətənimizin ərazi bütövlüyü uğrunda canından keçən şəhidlərimizin ruhunu bir dəqiqəlik sükutla yad etdilər. R.Əliyev idarənin hazırladığı layihələrdən söz açıb, bugünki layihənin qonağını salamlayıb, ona gül dəstələri və xüsusi hazırlanan hədiyyəni təqdim edib.
Layihənin aparıcısı Əminəxatun Tərlan tədbir iştirakçılarını salamlayıb, hazırda təqdim olunan layihənin yaradılmasında məqsədin peşəsindən, ixtisasından asılı olmayaraq öz sənətinin peşəkarı, sənətkarı və incisi olan insanları öz tamaşaçıları ilə görüşdürməyə vəsilə olmasını qeyd edərək, tədbirin qonağı olan şair, yazıçı, nasir, tərcüməçi, Yazıçılar birliyinin üzvü Seyran Səxavəti təqdim edib.
Seyran Səxavət də öz növbəsində gələn qonaqları salamlayıb, tədbirin təşkilində əməyi olan hər kəsə təşəkkürünü bildirib.
Sonra qonaqlar sırasında olan Azərbaycan Respublikasının Xalq şairi Sabir Rüstəmxanlı, şair Əməkdar mədəniyyət işçisi, Prezidentin Fərdi təqaüdçüsü Əşrəf Veysəlli, şairə, Əməkdar müəllim, Prezidentin Fərdi təqaüdçüsü Ofelya Babayeva və digər yazarlar çıxış edərək, Seyran Səxavət yaradıcılığının nə qədər geniş və dolğun olduğundan bəhs ediblər.
Sonda layihənin rəhbəri və "Dostluq” mədəniyyət evinin direktoru Gülnar Məmmədova tədbir iştirakçılarına, Seyran Səxavətə və əməyi keçən hər kəsə minnətdarlığını bildirib.
Tədbir musiqi nömrələri və çıxışlarla davam etdirilib.
Xəbərdən istifadə edərkən istinad etmək vacibdir.
