Sumqayıt Regional Mədəniyyət İdarəsinə tabeli Sumqayıt Dövlət Rəsm Qalereyasının təşkilatçılığı, Mədəniyyət İşçiləri Həmkarlar İttifaqı Sumqayıt şəhər Komitəsi, Azərbaycan Qızıl Aypara Cəmiyyəti Sumqayıt şəhər bölməsi və AYB Sumqayıt bölməsinin birgə dəstəyi ilə "Birliyimiz-Həmrəyliyimizdir” adlı sərgi-tədbir keçirilib. Tədbirdə rəssamlar, müəssisə və təşkilat rəhbərləri, ziyalılar və KİV nümayəndələri iştirak ediblər. Dünya Azərbaycanlıların Həmrəylik Gününə və "Şuşa ilinə” həsr olunan sərgi - tədbir Azərbaycanın Respublikasının Dövlət Himninin səsləndirilməsi ilə başlandıqdan sonra, şəhidlərin xatirəsi bir dəqiqəlik sükutla yad olunub. Moderator, yazıçı, dramaturq, kulturoloq Hafiz Ataxanlı Azərbaycanın dövlətçilik tarixindən, milli mücadilə yolundan bəhs edib və ulu öndər Heydər Əliyevin təşəbbüsü ilə formalaşan həmrəylik bayramının milli vəhdət prosesində oynadığı əhəmiyyətli rolunu vurğulayıb. Şəhid və qazi övladları içərisindən rəssamlığa meyilli uşaqların işlədikləri ayrı-ayrı atributlar, detallar lövhəyə gətirilib və qonaqların gözü qarşısında kompazisiya kimi quraşdırılıb. Beləliklə iki möhtəşəm əsər "Azərbaycan xəritəsi” və "Xarı bülbül rəsmləri” uşaqlar üçün də sürpriz olub. AYB Sumqayıt bölməsinin sədri Gülnarə Cəmalləddin, Mədəniyyət İşçiləri Həmkarlar İttifaqı Sumqayıt şəhər Komitəsinin sədri Şahin Şəfiyev, şəhid anası Ruhiyyə Əhmədova, tədqiqatçı publisist Üzeyir Əlizadə və rejissor - operator Etibar Bənnayev çıxış edərək düşünçələrini bölüşüblər. Çıxışlarda vətənin bütövlüyü uğrunda canını fəda edənlərin əbədiyyət səhifələrində yer aldıqları bildirilib. Azərbaycan Qızıl Aypara Cəmiyyəti Sumqayıt şəhər bölməsinin sədri Mətanət Məhərrəmova şəhidlik məqamının ucalığından danışıb, şəhid və qazi övladlarına hədiyyələr təqdim edib. Sumqayıt Dövlət Rəsm Qalereyasının direktoru Ellada Həsənova şəhid və qazi övladlarının qalereyada keçirilən ustad dərsi zamanı, onunla kreativ ideyasının kerçəkləşməsində mühüm rol oynayan istedadlı uşaqlara minnətdarlığını bildirib və uşaqların kətan üzərində yaratdığı kompazisiyanın qalereyanın fonduna daxil ediləcəyini və bir xatirə kimi daim saxlanılacağını söyləyib. Sonda Əhməd Bakıxanov adına Uşaq İncəsənət Məktəbinin xor kollektivi və müğənni Xəyal Cəbrayıllı musiqi nömrələri ilə çıxış ediblər.
Xəbərdən istifadə edərkən istinad etmək vacibdir.
