Azərbaycan Prezidenti İlham Əliyevin tapşırıq və tövsiyəsinə uyğun olaraq, fövqəladə hallar naziri, general-polkovnik Kəmaləddin Heydərov iyunun 29-da Siyəzən şəhərində şimal bölgəsindən olan vətəndaşları qəbul edib.
Xeberle.com Azərtac-a istinadən xəbər verir ki, qəbulda Quba, Qusar, Xaçmaz, Siyəzən və Şabran rayonlarının sakinlərinin və həmin rayonlarda məskunlaşan məcburi köçkünlərin müraciətlərinə baxılıb.
Siyəzən Rayon Dövlət Yanğından Mühafizə Hissəsinin inzibati binasında fövqəladə hallar naziri tərəfindən qəbul edilən vətəndaşların müraciətlərinin bir çoxu yerindəcə həllini tapıb. Bir sıra məsələlərlə bağlı qanunvericiliyə uyğun zəruri tədbirlərin görülməsi barədə aidiyyəti strukturların rəhbərlərinə tapşırıqlar verilib.
Bundan başqa, kadr məsələləri və digər məsələlərlə bağlı müraciət etmiş vətəndaşlar da nazir müavinləri və nazirliyin müvafiq baş idarə və qurum rəhbərliyi tərəfindən qəbul olunub.
Nazirliyin səlahiyyətlərinə aid olmayan məsələlərlə bağlı müraciətlər isə aidiyyəti orqanlara çatdırılması üçün qeydiyyata alınıb.
Xəbərdən istifadə edərkən istinad etmək vacibdir.
