Tərtər rayonunda işsiz vətəndaşların məşğulluğunun təmin edilməsi və sosial müdafiəsinin gücləndirilməsi istiqamətində tədbirlər davam etdirilir.
Xeberle.com Rayon Məşğulluq Mərkəzindən Azərtac-ın bölgə müxbirinə bildirilən məlumata istinadən xəbər verir ki, 2018-ci ilin altı ayında müraciət edən 960 nəfər işaxtaran vətəndaşdan 248-i, o cümlədən sosial müdafiəyə xüsusi ehtiyacı olan və işə düzəlməkdə çətinlik çəkən 13 nəfər kvota üzrə ayrılmış iş yerləri ilə təmin edilib. Vətəndaşlar əsasən kommunal təsərrüfat və tikinti-quruculuq sahələrində, mərkəzi xəstəxanada, su-kanal idarəsində işlə təmin olunublar.
Hazırda rayonun idarə və müəssisələrində 103 vakant iş yeri var. Əhalinin məşğulluğunun təmin edilməsi məqsədilə sentyabr ayında növbəti "Əmək yarmarkası” keçiriləcək.
Tərtər rayonunda Prezident İlham Əliyevin 2016-cı il 7 aprel tarixli Sərəncamının icrası ilə əlaqədar olaraq özünüməşğulluq proqramı da uğurla həyata keçirilir. İlin əvvəlindən 86 nəfər işsiz və işaxtaran şəxs ailə təsərrüfatlarını yaratmaq üçün təlimlərə cəlb olunub. Həmin şəxslər Əmək və Əhalinin Sosial Müdafiəsi Nazirliyi tərəfindən aktivlərlə təmin ediləcək və öz ailə təsərrüfatlarını formalaşdıracaqlar.
Xəbərdən istifadə edərkən istinad etmək vacibdir.
