İcbari Tibbi Sığorta üzrə Dövlət Agentliyindən Xeberle.com-a bildirilib ki, vətəndaşlara xidmətlər 2550 sayda tibbi xidməti əhatə edən Xidmətlər Zərfi çərçivəsində göstərilir. Dövlət səhiyyə sisteminə daxil olan tibb müəssisələrində bu xidmətlərin göstərilməsi mümkün olmadıqda, sığortaolunan göndəriş əsasında həmin xidməti yalnız Agentliklə müqaviləsi olan özəl tibb müəssisəsində əldə edə bilər.

Həkim göndərişi olmadan Agentliklə müqaviləsi olan qeyri-dövlət tibb müəssisəsinə müraciət edən sığortaolunan əldə etdiyi xidmətin dəyərini tam həcmdə özü ödəməlidir. Müqaviləli özəl tibb müəssisəsinə göndəriş olduğu təqdirdə Xidmətlər Zərfi çərçivəsində sığortaolunana göstərilən tibbi xidmətin dəyəri Agentlik tərəfindən qarşılanır. Sumqayıt şəhərində Agentliklə müqaviləsi olan özəl tibb müəssisəsi mövcud deyil.

Digər bölgələrdə qeydiyyatda olan sığortaolunanlar kimi Sumqayıt sakinləri də icbari tibbi sığortanın Xidmətləır Zərfinə daxil olan 2550 tibbi xidmətdən yararlana bilər. Xidmətlərin siyahısı ilə buradan tanış olmaq olar. Xidmətlər Zərfinə təcili tibbi yardım xidməti, ilkin səhiyyə xidməti, stasionar şəraitdə aparılan tibbi xidmətlər, terapevtik müalicələr, cərrahi əməliyyatlar, habelə açıq və qapalı ürək əməliyyatları, minimal invaziv üsulla həyata keçirilən müdaxilələr və sair kimi 950 sayda cərrahi əməliyyat daxildir. Stasionar müalicə və təcili təxirəsalınmaz tibbi yardım zamanı istifadə olunan dərman vasitələri də Xidmətlər Zərfi çərçivəsində təmin edilir.

Xeberle.com Sumqayıtda icbari tibbi sığortanın həyata keçirildiyi tibb müəssisələrini araşdırıb. İcbari tibbi sıorta aşağıdakı tibb müəssisələrində tətbiq edilir:

Sumqayıt Şəhəri Səhiyyə şöbəsi

Mərkəzi Qan Bankının Sumqayıt bölməsi

1 nömrəli Şəhər Xəstəxanası

2 nömrəli Şəhər Xəstəxanası

3 nömrəli Şəhər Xəstəxanası

4 nömrəli Şəhər Xəstəxanası

Sumqayıt Şəhər Təcili Tibbi Yardım Xəstəxanası

Sumqayıt Şəhər Uşaq Xəstəxanası

Oftalmoloji Xəstəxana

1 nömrəli Doğum Evi

2 nömrəli Doğum Evi

Təcili Tibbi Yardım Stansiyası

Vərəm Əleyhinə Dispanser

1 nömrəli şəhər poliklinikası

2 nömrəli şəhər poliklinikası

3 nömrəli şəhər poliklinikası

4 nömrəli şəhər poliklinikası

1 nömrəli uşaq poliklinikası

2 nömrəli uşaq poliklinikası

3 nömrəli uşaq poliklinikası

4 nömrəli uşaq poliklinikası

5 nömrəli uşaq poliklinikası

Uşaq Stomatoloji poliklinika

Sumqayıt şəhər Təsərrüfat hesablı tibbi sanitar hissəsi

"Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi Əmək Məcəlləsi və Agentliyin müvafiq Qərarı ilə tənzimlənir.Qaydaya əsasən tibb işçilərinin əməkhaqlarına vəzifə (tarif) maaşları, əmək şəraitinə görə ödənilən əlavələr, həvəsləndirici əlavələr və Əmək Məcəlləsində nəzərdə tutulmuş digər ödənişlər daxildir. Tibb işçilərinə həvəsləndirici əlavələr vəzifədən və yerinə yetirilən işin xüsusiyyətindən asılı olaraq, aylıq sabit və ya işin nəticələrinə görə aylıq həvəsləndirici əlavələr şəklində verilir. Tibb işçilərinə sabit həvəsləndirici əlavələr 16 ixtisas/vəzifə üzrə verilir. Bununla yanaşı, bir sıra ixtisaslar/vəzifələr üzrə sabit həvəsləndirici əlavələrin məbləği tibb müəssisələrinin fəaliyyət göstəricisindən asılı olaraq müəyyənləşdirilib. Belə ki, tibb müəssisələri 3 qrupa (1-ci, 2-ci və 3-cü qruplar) bölünüb.

Orta və kiçik tibb işçilərinin göstərdikləri xidmətlərin xüsusiyyətləri nəzərə alınaraq, onların aylıq vəzifə (tarif) maaşlarına tətbiq edilən həvəsləndirici əlavələr tutduqları vəzifələrdən asılı olaraq aylıq sabit əlavələr şəklində təyin olunur. Qərara əsasən iki vəzifə üzrə (Baş tibb bacısı (qardaşı) və Baş təsərrüfat bacısı (qardaşı)) aylıq sabit əlavələr tibb müəssisələrinin təsnifat qrupuna əsasən müəyyənləşdirilib.

Xədicə Səxavətqızı

Xeberle.com