Xallarla bağlı bir çox əfsanələr mövcuddur. Hər bir insanın bədənində mövcud olan bu xallar kiminə görə xoşbəxtlik əlamətidir, kiminə görə insanın həyatındakı düşmənlərin sayını göstərir. Hətta, qədim dövrlərdə göy rəngə çalan tüklə örtülmüş xal şeytan əməli hesab olunduğu üçün belə xalları olan qadınlar tonqalda yandırılırdılar. Bəs xal orqanizmdə hansı funksiyaları yerinə yetirir və hansı fəsadlar yarada bilər?
Sumqayıt Rayonlararası Onkoloji Dispanserinin onkoloqu Azər Abdiyev Xeberle.com-a  bildirib ki, dəridə xalların rənginin dəyişməsinin təhlükəli ola bilər. Gələcəkdə müxtəlif faktorların təsirindən günəş şuası stress zədələnmənin təsirindən şişə çevrilə bilir:  "Xallar öz rəngini və formasını dəyişərsə ehtiyatla davranmaq lazımdır. Əgər ölçü böyüyübsə həkimə müraciət etmək lazımdır.Vaxtında müraciət ediləndə əməliyyat edib götürmək olar.”
Onkoloq qeyd edib ki, bədənin açıq yerlərində (başda,üzdə görünən, zədələnə bilən, günəşin təsirinə çox məruz qalan yerlərdə) olan xallar daha təhlükəlidir. O, bildirib ki, orqanizmdə xalların artması təhlükəlidir. Xal öz-özunə yoxa cıxmır: "Xalın  nə ilə (bıçaqla yoxsa lazerlə)əməliyyat etməyin keyfiyyətə təsiri yoxdur. Lazer sadəcə əməliyyatın qansız keçməsini təmin edir.”
Onkoloq açıqlamasında melanomanın inkişaf riskini azaltmaq risklərindən də söz açıb. O, melanomanın inkişaf riskini azaltmaq üçün xalın zədələnmədən,günəşdən qorumağın vacibliyini vurğulayıb: "Melanoma şişə çevrilmiş xaldır. Ən təhlükəli xərçəng növlərindən biri sayılır. Gün vannalarından sui-istifadə, xalların travması,paltarların detalları ilə daim sürtülməsi və ya sıxılması, stress, genetik risk faktorları ola bilər. Xal çox iri olduqda əməliyyat olunması məsləhət görülür.Bu melanomanın inkişaf riskini azaldır. Əməliyyatı mutləq həkim etməlidir.”
Həkim  60 yaşdan yuxarı insanlarda şişə çevrilmə riskinin çox olduğunu diqqətə çatdırıb.  Qeyd edib ki, xalın zədələnməsi çox təhlükəlidir. İnsan qanaxmadan pis vəziyyətə düşə bilər: ”Həmin günü mütləq həkimə müraciət etmək lazımdır.Çünki sonradan xal surətlə şişə çevrilə bilər.”

Zeynəb Abdullah
Xeberle.com