Bütün insanların əsas məqsədi bu dünyada rahat və xoşbəxt yaşamaqdır. Lakin bunun üçün, ilk növbədə sağlam can olmalıdır. Çünki cansağlığı olmadan xoşbəxtlik də olmaz. Əhalinin sağlamlığının qorunmasında həkimin, onun peşəkar fəaliyyətinin və mənəvi mövqeyinin çox böyük rolu var. İlk öncə həkimlərin etik davranış qaydaları vacibdir, həkim xəstə ilə nə qədər qarşılıqlı səmimi münasibətlər yaradarsa, müalicə prosesində də bir o qədər uğur əldə edilər. Həkimin sənətinə vicdanla yanaşması da çox mühüm məsələlərdəndir. Ona görə ki, yaxşı həkim olmaq üçün ilk növbədə yaxşı insan olmaq lazımdır. Həm yaxşı, həm də vicdanlı və əsl peşəkar həkim xüsusiyyətlərini özündə birləşdirən şəxslərdən biri də savadı və biliyi, eyni zamanda alicənablığı ilə əsl insanlığa nümunə olan Sehri Fərəc oğlu Babayevdir. O, 1957-ci ildə Naxçıvanın Nehrəm kəndində dünyaya göz açıb. Uşaqlıqdan həkim olmaq arzusunda idi. Orta məktəbi bitirdikdən sonra 1973-cü ildə sənədlərini Tibb İnstitutuna verib. Lakin qəbul ola bilməyib, iki il müsabiqədən keçməyib. Buna baxmayaraq, məqsədindən dönməyib. 1976-78-ci illərdə sovet ordusunda əsgəri ximətdə olub, Tatarıstanın Kazan şəhərində artilleriya üzrə hərbi borcunu yerinə yetirib. Yaxşı xasiyyətnamə ilə Azərbaycan Tibb İnstitutunun hazırlıq kursuna gəlib və arzusuna çatıb. 1979-cu ildə artıq pediatriya sahəsi üzrə tələbə adını qazanıb. Fəal olduğu üçün ikinci kursdan fakültə həmkarlar təşkilatının sədri seçilib. Buranı bitirdikdən sonra Sumqayıtda iş fəaliyyətinə başlayıb. Həmin vaxtlar birləşmiş uşaq xəstəxanasının poliklinika şöbəsində üç ay sahə həkimi işləyib. Daha sonra intensiv terapiya şöbəsində növbəli çalışıb. Həkimlik peşəsinin sirrlərini öyrənib. 1993-cü ildən yoluxucu xəstəliklər şöbəsinə müdir təyin olunub. İşlədiyi müddətdə həmişə ictimai fəaliyyətlə məşğul olub. 1998-ci ildən şəhərin baş infeksionist həkimi kimi fəaliyyət göstərir. Baxmayaraq, uşaq həkimidir, bütün yaş kateqoriyalarına müəyyən məsləhətlərini verir. Artıq bir neçə aydır ki, təqaüdə çıxması ilə əlaqədar təcili tibbi yardım xəstəxanasının infeksion xəstəliklər şöbəsində həkim-konsultant kimi çalışır. Ağır yoluxucu xəstələrdən tövsiyələrini əsirgəmir. Bacarıqlı, savadlı həkim olduğuna görə şəhərimizdə sevilir, hörmət-izzət sahibidir.
2009-cu ildə Sumqayıtın 60 illiyi ilə əlaqədar sosial-iqtisadi inkişafda iştirakına görə ölkə Prezidenti İlham Əliyevin Sərəncamına əsasən ona respublikanın Əməkdar həkimi adı verilib. YAP-ın fəal üzvlərindəndir, ərazi ilk təşkilatının sədridir. Yaxşı işinə görə dəfələrlə tərifnamə və fəxri fərmanlara layiq görülüb.
Deyir ki, həkim doğulur, hər bir yaxşı, bilikli insan həkim ola bilməz.
S.Babayevin dediklərindən:
Uşaq həkimi olmaq böyük məsuliyyətdir. Uşaqlarımızın sağlamlığı bizim ən böyük sərvətimizdir. Oxuduğum müddətdə cərrah, professor Babaşov bizə həmişə deyərdi ki, uşaq həkimi mahir ovçular ceyrana necə yanaşırsa, o da belə yanaşmalıdır, yəni uşaq səndən qorxmamalı, ünsiyyətində ehtiyatlı olmalısan. Uşaqlar izah edə bilmirlər harası ağrıyır. Böyükləri, valideynləri özləri deyirlər. Uşaq həkimi gərək düzgün diaqnoz qoymağı bacarsın.
İşlədiyim vaxt ərzində çox maraqlı hadisələrlə qarşılaşmışam. Mən təzə işləyəndə elə bilirdim ki, xarici ölkənin xəstəxanasındayam. Digər millətlərin nümayəndələri ilə çiyin-çiyinə çalışırdıq. Bir dəfə bir qız uşağından valideynləri əllərini üzmüşdülər, erməni əsilli tibb işçiləri də ona biganə yanaşırdılar, mən laqeydlik göstərmədim, uşağı yoxladım, həqiqətən də vəziyyəti çox ağır idi. Valideyninə dedim aparmağa tələsməyin, ilkin yardım etdim, uşaqla ciddi məşğul oldum, onu həyata qaytardım, bir həftəyə tam sağaltdım. Həmin qızın toyunda da iştirak etmişəm, hazırda anadır.
Haqlı olaraq deyilir ki, insan taleyi hakimlər və həkimlərin əlindədir. Hər cür insanlarla qarşılaşırıq. Onlara gərək diqqət və qayğı ilə yanaşıla. Ümumiyyətlə, həkim sanitar maarifçi olmalıdır. Xəstəliklə bağlı elmi əsaslarla düzgün izahat verməlidir.
Uşaqlar arasında infeksion xəstəliklər təkcə respublikanın deyil, dünyanın problemidir. İnfeksiyalar idarə olunan və idarə olunmazdır. Qızılca xəstəliyi ömürlük immunitet qazanan xəstəlikdir. Əvvəllər valideynlər peyvəndlərdən imtina edirdilər. Lakin artıq anlayıblar ki, peyvəndlənmə vacibdir. Valideynlərə övladlarının sağlamlığına artıq dərəcədə diqqətli olmağı tövsiyə edirəm.
Bir daha qeyd edim ki, yoluxucu xəstəliklərdən qorunmağın ən təsirli üsulu peyvəndləmədir. Ölkəmizə gətirilən peyvəndlər təhlükəsizdir və keyfiyyətcə standartlara uyğundur. Peyvənd yoluxucu xəstəliklərin geniş yayılmasının qarşısını alır, yoluxma halında isə daha yüngül və qısamüddətli təsir verir. Mən şəxsən hər il mövsümlə bağlı qripə qarşı özümə peyvənd etdirirəm və bu xəstəliyə yoluxmuram, yaxud reaksiyam yüngül olur.
Xəstəliklərə yoluxma və onları ağır keçirmə əksər hallarda immun sisteminin zəifləməsi ilə əlaqədar olur. İmmun sistemini yaxşı vəziyyətdə saxlamaq üçün balanslı qidalanmaq, yuxu rejiminə düzgün riayət etmək, stressdən və zərərli vərdişlərdən uzaq olmaq lazımdır. Bu qaydalara əməl edilərsə, virus xəstəliklərini yüngül keçirə və heç yoluxmaya bilərik.
Pandemiya zamanı da şükürlər olsun ki, Sumqayıtda digər şəhərlərlə müqayisədə koronovirusa yoluxma və ölüm halları azlıq təşkil etdi.
Difteriya və poliomielit xəstəliklərinə ölkəmizdə demək olar ki, artıq rast gəlinmir. Hazırda şəhərimizdə yoluxucu xəstəliklərə tutulma ehtimalı azdır. Uşaqlar arasında mədə-bağırsaq infeksiyaları, mövsümi kəskin respirator xəstəlikləri mövcud olsa da, bunların vaxtında aşkarlanması və aradan qaldırılması istiqamətində bütün tədbirlər görülür.
Bəli, həkim Sehri Babayevin dediklərinə diqqətlə qulaq asaraq qəlbimdən bu nida qopdu: "Ağ xalata dəyər verən həkimlərimizi qoruyaq!”
İlhamə MƏHƏMMƏDQIZI
Xəbərdən istifadə edərkən istinad etmək vacibdir.
