Həkim adını daşımaq nə qədər məsuliyyətli olsa da, bir o qədər də şərəflidir. Möcüzəli əlləri ilə insanlara şəfa bəxş edərək, yaşama ümidlərini artırmaq, xoş bir sözlə könüllərini ovutmaq… Düzgün müayinə edib, düzgün diaqnoz qoymaq isə hər həkimin işi deyil və bunu yaxşı bilən həkimlərin qapısı isə hər zaman döyülür.
İnsan o zaman xoşbəxt ola bilər ki, öz peşəsini ürəkdən sevsin, peşəsinin xalq üçün gərəkli olduğunu, ona fayda verdiyini dərk etsin. Həkimlik sənəti qəhrəmanlıq, hünər deməkdir. Bu peşə insandan fədakarlıq, pak niyyət tələb edir. Hər kəs buna qadir ola bilməz. Bunun üçün həkimin fikri aydın, qəlbi təmiz olmalıdır. Həkim olmaq Motsartın bəstəsinə bənzəyir: yeni başlayanlar üçün asan, ustadlar üçün isə çox çətin bir anlama malikdir.
Məhz Təranə xanım da belə insanlardan biridir. Halal zəhməti, təmiz əqidəni həyat amalı seçən sədaqətli insan. Neçə-neçə körpə ürəkləri işıqlandıran, o ölümün pəncəsindən xilas edib anaların ümid çırağını sönməyə qoymayan Təranə xanımın əlbəttə, üzüağ, başıuca yaşamağa böyük haqqı var. Bu mətanətli həkim hər dəfə bir insan ömrünə çıraq yandıranda öz ömür kitabı da vərəqlənir. Sevinir ki, ömrü hədər keçməyib, insanın,insanlığın keşiyində bir loğman kimi, bir əsgər kimi sədaqət və mətanətlə qulluq edib.
Qısa arayış: Təranə Zakir qızı Rəcəbli 16 mart 1972-ci ildə Sumqayıt şəhərində anadan olub. 1989-1995-ci illərdə N.Nərimanov adına Azərbaycan Dövlət Tibb Universitetinin Pediatriya fakültəsində təhsil alıb. Universiteti bitirdikdən sonra həkim-pediatr ixtisasına yiyələnərək, Sumqayıt şəhər 1 saylı Doğum evində fəaliyyətə başlayıb.
O, 1997-2008-ci illərdə 1 saylı Doğum evində şöbə müdiri, 2008-2014-cü illərdə "Real” Tibb Mərkəzində direktor vəzifələrində işləyib. 2014-2016-cı illərdə Respublika Perinatal Mərkəzində baş həkim kimi fəaliyyətini davam etdirib. Hazırda "Sumqayıt Tibb Mərkəzi" Publik Hüquqi Şəxsin direktor müavini və Perinatal Mərkəzin rəhbəridir.
30 illik təcrübəyə sahib olan Təranə Rəcəbli ömrünü tibbin ginekologiya sahəsinə həsr edib. Fəaliyyəti dövründə çoxsaylı yerli və beynəlxalq konfransların iştirakçısı olub, müxtəlif qurumlar tərəfindən Fəxri fərman, diplom və medallarla təltif edilib.
Təranə Rəcəbli ölkə başçısının 20 noyabr 2019-cu il tarixli Sərəncamı ilə "Əməkdar həkim" fəxri adına layiq görülüb.
Əməkdar həkim Tərəni Rəcəbli uzun illərdir ki, Azərbaycanda perinital tibbin inkişafına böyük tövhələr verib.
O, Sumqayt Perinital Mərkəzinin Respublika səviyyəsində nüfuzlu tibb ocağına çevrilməsində mühüm rol oynayıb.
2016-cı ildən etibarən onun rəhbərliyi altında Sumqayt şəhərində yerləşən bir saylı doğum evi 3-cü səviyyəli perinatal mərkəzə çevrilib.
Məhz onun rəhbərliyi ilə mərkəz regionun risk qrupuna daxil olan hamilələri, eləcə də yeni doğulmuşları qəbul edən ixtisaslaşmış müəssisə kimi fəaliyyətini genişləndirib.
Neanatologiya, neonatal reanimasiya və intensiv terapiya sahələrində əldə edilən naliyyətlər nəticəsində Sumqayt Perinatal Mərkəzi bugün yalnız Sumqayt şəhərinin deyil, bütövlükdə regionun aparıcı perinatal mərkəzlərindən biri hesab olunur.
Mərkəzdə neonatal cərrahiyə, perinatal və antenal skrininqlər, yeniyetmələrin reproduktiv sağlamlıq xidməti, eləcə də görmə əlilliyinin qarşısının alınması məqsədi ilə retinopatiya müayinələr aparılır.
Respublikanın müxtəlif bölgələrindən pasiyentlər məhz bu xidmətlər üçün Sumqayt Perinatal Mərkəzinə yönləndirilir.
Təranə Rəcəbli yalnız səhiyyə sahəsində deyil, ictimai fəaliyyəti ilə də tanınır.
O, ana və uşaq sağlamlığı ilə bağlı müxtəlif təşəbbüslərə dəstək verməklə yanaşı, tibbi xidmətlərin keyfiyyətinin artırılması istiqamətində də mühüm addımlar atır.
Onun rəhbərliketdiyi mərkəz, "Körpə dostu” təşəbbüsünə qoşularaq 7 gün 24 saat təcili tibbi yardım xidmətini təmin edir, ağrısız doğuş və təbii doğuş metodlarını təşviq edir.
Uğurunun sirrini soruşduqda isə Tərəni xanım sadəcə bir cümlə ilə cavab verir: "Biz komanda olmağı bacarırıq”.
Bu gün həmin komandanın lideri, aparıcı lokomotivi Təranə Rəcəblinin doğum günüdür.
Onu bu münasibətlə təbrik edir, möhkəm can sağlığı, şərəfli fəaliyyətində yeni-yeni uğurlar arzulayırıq!
Çox insanın ümid yeri bu qadın,
Sözləri yolda qalanlara çıraqdır.
Övladdır,anadır, bacıdır, yardır,
Əsl vətəndaşdır, dostdur, sirdaşdır.
Əziz övlad kimi geniş ürəkli,
Valideyn qədrini bilən biridir.
Daima can deyər ana zənginə,
Sevgisi sonsuzdur, diqqəti ali.
Candır, övlada arxa-dayaqdır,
Gecəli-gündüzlü övlada haydır.
Ürəyi döyünür, sevgisi baldır,
Çünki əvəzolunmaz gözəl anadır,
Bacıdır, dayaqdır bacı-qardaşa,
Həm xoş günündə, həm şad günündə,
Pərvanə şamına vurğun olan tək,
Daima arxadır, yolda yoldaşdır.
Əsl vətəndaşdır, vətənsevərdir,
Dövlətin, şəhərin daim öyəndir,
Xeyir işlərlə ona dəstəkdir
Qocaya, cavana, darda olana.
Köməkdir, dayaqdır bizim Təranə.
Elin məhəbbətini qazanmış insanlar elin gözündə ucalır, sevilir və qiymətləndirilir. Vaxtında verilən qiymət həmişə gözəl olur. Gözəl əməl sahiblərini Tanrı da sevir və hifz edir.. Təranə Rəcəbli kimi...
Yusif Oğuz
Xəbərdən istifadə edərkən istinad etmək vacibdir.
