- Əvvəlcə sanatoriyanız haqqında ümumi məlumat vermənizi istərdik
Bizim Sanatoriya kompleksimiz uzun müddətdir ki, fəaliyyət göstərir. Sovetlər vaxtında bura Litva sanatoriyası adlanırdı. Sanatoriya Litvanın Səhiyyə Nazirliyinin balansında idi. Sonradan isə bura özəlləşdirildi və yüksək səviyyədə - son standartlara uyğun təmir edildi. Hazırda bizim kompleksə 3 otel, 2 restoran, kafe, bar, böyük müalicəvi mərkəz, Aqua park, stomatoloji klinika, SPA mərkəzi, boulinq zalı, tennis kortu daxildir. Ərazidə 250 metrdən mineral su çıxır və burada dairəvi su qalereyası yaradılıb. Sadaladığım bu mərkəzlər 1.5 hektar ərazini əhatə edir. Bizim ərazi Druskininkay şəhərinin mərkəzində yerləşir. Avtobus dayanacağı sanatoriyanın yaxınlığındadır. Bununla yanaşı qonaqlarımızı Litvanın istənilən ərazisindən transfer edə bilərik. Sanatoriyamızda 326 nəfər işçi heyyəti var. Eyni vaxtda 800 qonaq qarşılamaq gücündəyik. Qeyd etdiyim kimi 3 otelimiz var. Bunlar 3+, 4 və 4+ ulduzdur.  Qonaqlarımızın seçimi üçün bu, çox önəmlidir. Çünki burda həm də qiymət rol oynayır. Sanatoriyamız ekoloji cəhətdən çox yüksək səviyyədədir. Belə ki, isitmə sistemi geotermik yolla fəaliyyət göstərir. Neft və qazdan istifadə olunmur. Gələcəkdə günəş batareyaları və elektromobillərdən istifadə nəzərdə tutulur. Bunu etməkdə məqsədimiz ətraf mühiti çirkləndirməmək və ekoloji balansı maksimum qorumaqdır.
- İnsanlar nə üçün sizin sanatoriyanı seçməlidirlər?
Biz Litvanın cənubunda yerləşirik. 2 ölkə ilə, Belarus və Polşa ilə  həmsərhədik. 50 km radiusunda  heç bir istehsal sahəsi - zavod, fabrik yoxdur. Hər tərəf meşə ilə əhatələnib.  Gözəl çay və göllər var. Burada tək hava ilə də müalicə almaq olar. Sanatoriyanın ərazisində balıqla bol Neman çayı axır.
- "Grand SPA Litva”nı digər sanatoriyalardan nə fərqləndirir?
İlk növbədə bizim kompleksə daxil olan binalar bir-biri ilə körpü vasitəsi ilə bitişikdir. Bu, yayda elə də əhəmiyyət kəsb eləmir. Amma soyuq havalarda bizə gələn müştərilərimiz üçün çox vacibdir. Qaldığı nömrədən müalicə alacağı binaya oradan Aqua parka və digər yerlərə yüngül geyimdə, rahat şəkildə hərəkət edə bilərlər. İkinci növbədə bizdə uşaqların əylənməsi üçün müxtəlif guşələr var. Valideynlər uşaqları xüsusi nəzarət altında olan istənilən əyləncə mərkəzinə təhvil verə bilər və öz istirahətlərini, müalicələrini rahat şəkildə ala bilərlər.  Bu da ondan xəbər verir ki, bizim sanatoriya ailəvidir. Burada hamı nəzərə alınıb. Hətta uşaqlar üçün massaj otaqları da var. Açıq bufetlərimizdə uşaqların ürəyincə olan qidalar verilir.
- Sanatoriyanıza xarici qonaqları necə cəlb edirsiniz?
Çalışırıq ki, əcnəbi ölkələrdə olan turizm sərgilərində iştirak edək. Həmçinin xarici turizm agentlikləri ilə əlaqə yaradırıq. Son vaxtlar sosial şəbəkələrdən gələn müştərilərin sayında artım hiss olunur. İldən-ilə bu rəqəm artır. Ona görə də fikirləşirik ki, yaxın müddətdə artıq sanatoriyanı tanıtmaq və ya əlaqə qurmaq üçün səfərlər etməyə ehtiyac qalmayacaq. Amma bununla yanaşı, təqdimat üçün konkret olaraq müəyyən edilmiş ölkələrə getmək lazım gələcək.
- Hansı ölkələrdə sizin təqdimatınız keçirilib?
Rusiya, Çexiya, Azərbaycan, Almaniya və digər dövlətlərdə təqdimatlar etmişik.
- Maraqlıdır, müştəriləriniz əsasən hansı ölkələrdəndir?
İlk olaraq onu qeyd edim ki, Rusiyadan gələnlər arasında kəskin azalma var. Bunun səbəbi isə 2014-cü ildə dövlət və hərbi adamların Avrozonaya girişinə qadağa qoyulmasıdır. Ən çox ziyarətçilər isə İsrail, Belarus, Polşa, Almaniyadandır. Əvvələr Azərbaycandan da çox sayda qonağımız olurdu. Son illər Azərbaycandan da azalmalar müşahidə olunur. Amma biz bu məsələni həll etmək üçün bir çox işlər görmək niyyətindəyik. Yeri gəlmişkən, 3 ay sonra - sentyabrda yenidən Bakıda təqdimat keçirməyi planlaşdırırıq. Çünki azərbaycanlı qonaqların sanatoriyamızdan istifadəsindən hər zaman məmnun qalmışıq.
- Sanatoriyanıza əsasən hansı xəstəlikdən əziyyət çəkənlər müraciət edə bilərlər?
Ürək çatışmazlığı, onurğa problemi, mədə-bağırsaq sistemində pozuntuları olanlar bizim sanatoriyaya müraciət edə bilərlər. Bizdə onlar ən son texnoloji aparatlarla, prosedurlarla, həmçinin müxtəlif otlar vasitəsi ilə müalicə olunacaqlar.
- Müalicəvi prosedurlar sizdə necə keçirilir?
Müştəri bizim sanatoriyaya həkim baxışından sonra da gələ bilər. Və ya həkim baxışı burada da ola bilər. Prosedurların sayı məhz əldə olunan nəticlərdən asılıdır.  Təbii ki bunu bizim sanatoriyanın həkimləri müəyyən edir. Üstəlik bizim ən müasir laboratoriyalarımız fəaliyyət göstərir. Bu laboratoriyalarda istənilən analizlərin nəticələri yarım gün ərzində təqdim edilə bilər.
- Bir az da mətbəxiniz haqda danışardınız.
Yeməklə bağlı bizdə hər hansı bir qadağa yoxdur. Mətbəximiz dietik deyil. Bunu insanların öhdəsinə buraxmışıq. Əsasən bizdə Avropa mətbəxidir.
- Qiymət paketləriniz haqqında məlumat verərdiniz.  Misal üçün minimum paketə nələr daxildir?
Təbii ki, minimum paketə ilk olaraq nömrədə qalma, səhər yeməyi, Aqua park daxildir.  Əlavə ödəniş edilməklə günorta və axşam yeməyi də sifariş edə bilər. Müştəri yemək seçimində də azaddır. Belə ki, o hər hansı bir restoranımızdakı yeməkləri bəyənmirsə, digər restoranımıza da müraciət edə bilər. Başqa sözlə, hər şey müştərinin istəyi ilədir.
- Neçə ildir buraya rəhbərlik edirsiniz?
Mənim ixtisasım hüquqşünasdır. Sanatoriyada uzun müddətdir ki, çalışıram. 2012-ci ildən rəhbər vəzifəsindəyəm. Yaşımla əlaqədar olaraq təqaüdə çıxmışdım. Amma məni yenidən rəhbər vəzifəyə dəvət etdilər.
Son olaraq Vladimr Şipakov bildirdi ki, bu sanatoriyada Azərbaycan vətəndaşlarını tam təmin edə biləcək xidmət sahələri var: "Əminliklə deyə bilərəm ki, bura onların ürəyincədir. Bildiyim qədəri ilə sizin ölkənin vətəndaşları yaxın ərazilərdəki sanatoriyalara üz tutur. Amma onlara bildirmək istəyirəm ki, bizim sanatoriyaya gəlməyinə dəyər. Həm xidmət, həm qida, həm buranın havası, təbiəti, həmçinin bizdə olan müalicəvi prosedurlar, eləcə də təbii mineral sularımız ürəyinizcə olacaq. Mütləq gəlin. Yolunuzu gözləyirik."

Müsahibəni aldı: Kamal Almuradlı, Elnur Ağayev
 

Xəbərdən istifadə edərkən istinad etmək vacibdir.