Kəskin istilər uşaqlarda bəzi xəstəliklər yarada bilər. Xeberle.com bu dəfə yay mövsümü ilə bağlı uşaqlarda yarana biləcək xəstəlikləri araşdırıb. Bu barədə Sumqayıt şəhər Səhiyyə Şöbəsinin baş pediatrı Xalidə Quliyeva saytımıza bunları söyləyib: "Uşaqlarda yay xəstəlikləri deyiləndə ilk ağıla gələn mədə-bağırsaq infeksiyalarıdır. Bunun üçün içdiyimiz suların, habelə yediyimiz qidaların yuyulduğu suların təmiz və filtirlənmiş olması əhəmiyyətlidir. Valideynlərə məsləhətim odur ki, övladlarına soyuq mühitdə olmayan və açıq şəkildə satılan ərzaq və içkilərin istifadəsi üçün razılıq verməsinlər”.
 "Unikal Klinika”nın pediatrı Rəşad Həsənov da valideynləri ehtiyyatlı olmağa çağırır: "Yay mövsümündə uşaqlarda ən çox rast gəlinən  xəstəliklər bağırsaq infeksiyalardır. Bu infeksiyalar insana yaxşı bişməmiş ət, süd, yumurta və digər heyvan məhsulları, çirkli su vasitəsilə keçə bilər. Ümumi olaraq bu xəstəliklər ishal, yüksək qızdırma, ürəkbulanması, qusma, qarında sancılar və.s. kimi əlamətlər ilə müşayiət olunur. Bunlardan əlavə, yay mövsümündə virus infeksiyalarına da rast gəlinir ki, ən çox yayılanları rotaviruslardır. Bu xəstəlik zamanı da qızdırma, qusma, ishal və digər hallar baş verə bilər. Qızdırma adətən 3 gün olur, ishal isə yüngül formada 7-10 günə keçib gedir. Yay mövsümündə meyvələrlə qidalanma zamanı isə uşaqlarda daha çox allergik reaksiyalar özünü göstərə bilər. Bundan əlavə, hər hansı bir meyvə normadan artıq yeyilərsə, həzm pozğunluğu yarana bilər. Nəticədə orqanizm yalnız 3-4 gün keçdikdən sonra özünü bərpa edər. Övladlarını bu xəstəliklərdən qorumaq üçün valideynlərə tövsiyəm ət, süd, yumurta və digər heyvan mənşəli məhsullarının suda yaxşı qaynadılması, heyvanlarla və ya onların çiy məhsulları ilə təmasda olarkən gigiyena qaydalarına əməl edilməsi, xəstəliyin yayılmaması üçün soyuducuda çiy məhsullarla bişmiş məhsulların eyni yerdə qoyulmaması və yeməkdən əvvəl uşaqların  əllərinin yaxşı-yaxşı yuyulması qaydalarına riayət olunmasıdır”.
Ümidvarıq ki, bu açıqlamalardan sonra valideynlər mütəxəssislərin bu tövsiyələrini nəzərə alacaq və gələcəyimiz olan uşaqların sağlam formada böyümələri üçün lazımi tədbirlər görəcəklər.
Elnarə Salamova
Xeberle.com

Xəbərdən istifadə edərkən istinad etmək vacibdir.