Sumqayıt şəhər Uşaq Xəstəxanasının endokrinoloqu Təranə Baxşıyevaya Xeberle.com-a açıqlamasında bildirib ki, piylənmə əsasən uşaqların həyat tərzi ilə bağlıdır: " Piylənmə daha çox uşaqlarda qidalanma, aşağı materika, az hərəkətlə (bütün günü dərs oxumaq və ya komputer qarşısında oturmaq, telefonla oynamaq) bağlı yarana bilər. Bu əsasən uşaqların həyat tərzi ilə bağlıdır. Kalorili qidalar və bu qidalanmanın sonrasında hərəkətsizlik uşaqlarda piylənmənin yaranmasına gətirib çıxaran əsas amillərdəndir. Piylənmə uşaqlarda endokrin pozğunluqla və ya genetik sindromlarla bağlı da yarana bilər. Amma uşaqlarda piylənməyə səbəb kimi bunlara çox nadir hallarda rast gəlinir”.

T. Baxşəliyeva qeyd edib ki, son vaxtlar uşaqlarda ikinci tip şəkətli diabet xəstəliyinin yaranmasında artım müşahidə olunur:

"Piylənmə uşaqlarda şəkərli diabet xəstəliyinin ikinci tipinin yaranmasına gətirib çıxara bilər. Şəkərli diabetin bu tipi Yaponiya, Amerika kimi inkişaf etmiş ölkələrdə lap əvvəl yaransa da, Azərbaycanda yeni-yeni yaranmağa başlayıb. Çox vaxt uşaqlarda şəkərli diabetin əsasən birinci tipini rast gəlinir, lakin piylənmənin qarşısı alınmasa, onlarda ikinci tip şəkərli diabet xəstəliyi də yarana bilər. Hətta deyərdim ki, keçən il ilə müqayisədə bu il uşaqlarda şəkərli diabetin ikinci tipinin yaranmasında artım müşahidə olunur. Bundan başqa piylənmə ürək-damar xəstəlikləri, qaraciyərin böyüməsi, cinsi inkişafın geri qalması ( qızlarda aybaşının pozulması və ya gecikməsi, oğlanlarda xayanın inkişafdan qalması) ilə nəticələnə bilər”.

Həkim vurğulayıb ki, idmanla məşğul olmaq, hərəkət etmək, aktiv həyat tərzi keçirmək lazımdır:

"Valideynlər piylənmənin qarşısını almaq üçün ilk növbədə uşaqlarda qida mədəniyyəti yaratmağa çalışmalıdırlar. Uşaqlar çox vaxt iradəsiz formada qidalanırlar, fikirləri başqa yerdə olduğu üçün nə yediklərini, nə vaxt doyduqlarını bilmirlər. Qida mədəniyyətini yalnız uşaq deyil, valideyn də özündə formalaşdırmalıdır. Uşaqların qidalanmasında əsasən tərəvəz və meyvələrə, duru yeməklərə üstünlük verilməli və tez mənimsənilən karbohidratlar maksimum dərəcədə azaldılmalıdır. Bundan başqa maye qəbulu da mütləq şəkildə nəzərə alınmalıdır. Eyni zamanda idmanla məşğul olmaq, hərəkət etmək, aktiv həyat tərzi keçirmək lazımdır. Uşaqda endokrin pozğunluq olduğu təqdirdə, həkim həmin uşağa əlavə müalicə yazır. Əgər endokrin pozğunluq yoxdursa,həmin uşaqda qida mədəniyyəti yaradılmalı, onun aktiv həyat tərzi keçirməsinə nəzarət olunmalı və belə uşaqlarla dietoloq xüsusi olaraq məşğul olmalıdır”.

Elnarə Salamova

Xeberle.com