Məlumdur ki, Azərbaycan Respublikası Prezidentinin 2007-ci il 27 dekabr tarixli sərəncamı ilə "Azərbaycan Respublikasının Nazirlər Kabineti yanında İcbari Tibbi Sığorta üzrə Dövlət Agentliyi” yaradılıb. Agentliyin strukturu 2016-cı il 15 fevral fərmanı ilə təsdiqlənib və icbari tibbi sığorta ölkənin bir neçə rayon və şəhərində həyata keçirilib. Xeberle.com olaraq icbari tibbi sığortanın Sumqayıt şəhərində nə vaxt tətbiq ediləcəyini araşdırmağa çalışdıq. İcbari Sığorta üzrə Dövlət Agentliyinin ictimaiyyətlə əlaqələr şöbəsindən saytımıza bildirildi ki, icbari tibbi sığortanın yaxın gələcəkdə digər regionlarda da həyata keçirilməsi nəzərdə tutulub:

 

"Hazırda icbari tibbi sığorta prezidentin fərmanı ilə Yevlax, Ağdaş rayonlarında və Mingəçevir şəhərində pilot layihə şəklində həyata keçirilir. Daha sonra bütün ölkə ərazisində mərhələli şəkildə həyata keçirilməsi nəzərdə tutulub. Nəticələr təhlil olunduqdan sonra yaxın gələcəkdə digər regionlarda da həyata keçirilməsi planlaşdırılır”.