Azərbaycan səhiyyə sisteminin aktual məsələlərindən biri də həkimlərin dərman firmalarıyla işbirliyinin olmasıdır. Ötən illərə nisbətən indiki şəraitdə bu işbirliyi qismən azalsa da, problem tam həllini tapmamaqda davam edir. Bir çox apteklərin nümayəndələri vaxtaşırı xəstəxanaları gəzir və həkimlərə xəstələrə məhz onların dərmanlarını vermələri müqabilində müəyyən təkliflər edirlər. Həkimlərin böyük əksəriyyəti isə daha çox qazanmaq səbəbi ilə bu işbirliyinə qoşulurlar. Məsələnin problemli tərəflərindən biri isə odur ki, dərman şirkətləri ilə anlaşan həkimlər öz xəstələrinə ucuz və keyfiyyətsiz dərmanları çox baha qiymətə almağa sövq edirlər. Yəni, faktiki olaraq həkimlər öz xəstələrinə bilərəkdən və şüurlu şəkildə maddi və mənəvi ziyan vururlar. Bir neçə il öncə Səhiyyə Nazirliyi bu "işbirliyi”nin qarşısını almaq üçün vahid resept üsulunun tətbiqinə başlamışdı. Amma görünür ki, bu qayda da problemin həlli deyil. Bəzi həkimlər tərəfindən yazılan dərmanların yalnız ya həmin tibb müəssisəsində olması, ya da təkcə bir aptekdə satılması son zamanlar digər bir problemin yaranmasına da gətirib çıxarıb. Üstəlik bu dərmanların əvəzedicilərinin belə olmaması xəstələr üçün əlavə baş ağrısına çevrilir. Məsələ barədə Xeberle.com-a açıqlama verən tibb eksperti Adil Qeybulla bu kimi halların qarşısının alınması üçün müvafiq tədbirlərin görülməyə başladığını bildirdi:

 

"Bu məsələ ölkəmizdə artıq eybəcər bir forma alıb. Bununla bağlı müvafiq işlərin, tədbirlərin görülməsinə başlanılıb. Əslində bu, düzgün bir mübarizədir. Çalışmaq lazımdır ki, bu kimi halların qarşısı alınsın. Düşünürəm ki, xəstələri müəyyən ünvanlara yönəltmək, satılan dərmanlardan faiz almaq həkim etikasına sığmayan məsələlərdir. Həkim öz işi ilə məşğul olmalıdır”.