Uşaqların inkişafına əhəmiyyətli dərəcədə təsir göstərən burun-boğaz əti (adenoid) ilə bağlı yaranan problemlər valideynləri daim narahat edən əsas məsələlərdəndir. Yaranan bu problemlərə görə onların ilk olaraq üz tutduqları ünvan LOR (burun-boğaz həkimi) olur. Bəs azyaşlılarda burun-boğaz xəstəlikləri ilə əlaqəli olan adenoidi neçə yaşdan sonra əməliyyat etdirmək olar? 

Bu barədə Xeberle.com-a açıqlama verən Sumqayıt şəhər Uşaq Xəstəxanasının LOR həkimi Şəhriyar Əliyev bildirdi ki, tibbdə bunun üçün xüsusi bir göstəriş yoxdur: "Uşaqlarda burun-boğaz ətinin hansı yaşda kəsilməsi ilə bağlı xüsusi bir göstəriş yoxdur. Əgər uşaq hər ay angina xəstəliyi keçirirsə, onu 2-3 yaşında belə əməliyyat etmək olar. Amma uşaq ildə iki-üç dəfə boğaz ağrısı keçirirsə, çalışırıq ki, onu dərmanlarla vasitəsilə 15 yaşına kimi əməliyyat etməyək”. Burun-boğaz ətinin kəsilməməsinin hansı fəsadlar törədə biləcəyi məsələsinə isə həkim bu cür aydınlıq gətirdi: "Əgər burun-boğaz əti kəsilməzsə, bu hal ürəkdə, oynaqlarda və böyrəkdə revmatizma yaranması ilə nəticələnə bilər”.