Zəngin mədəni
irsə malik olan türk xalqları qədim dövrlərdən etibarən Avrasiya materikinin
geniş ərazilərində məskunlaşmışdılar. Bu ərazilərdə məskunlaşmış türkdilli
xalqların özünəməxsus mədəniyyətləri formalaşmışdır. Zaman-zaman yadellilərin
hücumlarına məruz qalsalar da igidlikləri, qorxmazlıqları ilə ad qazanmış türklər
öz azadlıqları uğrunda cəsarətlə vuruşmuş, heç vaxt əsarətə boyun əyməmişlər.
Türk xalqlarının əyilməzliyini görən yadellilər öz çirkin məqsədlərinə çatmaq
üçün bu xalqları müxtəlif tarixi dövrlərdə deportasiyalara məruz qoymuşlar. Nəticədə bir çox türkdilli xalqlar öz tarixi
vətənlərini tərk etmək məcburiyyətində qalmışlar.
1813-cü il
Gülüstan və 1828-ci il Türkmənçay müqavilələrindən sonra Cənubi Qafqaza köçürülən
ermənilər rus imperiyasına arxalanaraq Qərbi azərbaycanlılara qarşı etnik təmizləmə
siyasəti yürütmüşlər. Qərbi Azərbaycanda etnik təmizləməyə məruz qalan həmvətənlərimiz
indi artıq Qərbi Azərbaycan İcmasını yaratmış və öz
tarixi haqlarını bərpa etmək üçün birləşmişlər.
16 mart
2023-cü il tarixində Ankarada Türk Dövlətləri Təşkilatının Dövlət Başçılarının
Fövqəladə Zirvə görüşündə çıxışı zamanı Cənab prezident İlham Əliyev Azərbaycan
xalqına münasibətdə yol verilən tarixi ədalətsizlik haqqında geniş məlumat
verdi. Ölkə başçımız qeyd etdi ki, tarixi torpağımız olan Qərbi Zəngəzurun
1920-ci ilin noyabr ayında sovet hökumətinin qərarı ilə Azərbaycandan ayrılıb
Ermənistana verilməsi Türk dünyasının coğrafi cəhətdən ayrılmasına səbəb
olmuşdur. 1991-ci ilə qədər bütün azərbaycanlılar indiki Ermənistan ərazisindən
zorla qovulmuşlar. Ermənilər Qarabağda və Şərqi Zəngəzurda olduğu kimi, indiki
Ermənistan ərazisində, yəni, Qərbi Azərbaycanda da mədəni irsimizi, məscidləri,
tarixi abidələrimizi dağıtmışlar. Azərbaycan ictimaiyyəti dəfələrlə UNESCO-ya
indiki Ermənistanda Azərbaycan xalqının mədəni irsinin monitorinq edilməsi məqsədilə
bu ölkəyə faktaraşdırıcı missiyanın göndərilməsi xahişi ilə müraciət etmişdir.
Qərbi Azərbaycan
İcmasında birləşmiş soydaşlarımızın məqsədi dinc və sivil yollarla öz tarixi vətənlərinə
qayıtmaqdır. İcmanın hazırladığı Qayıdış Konsepsiyasına əsasən, indiki Ermənistan
ərazisindən zorla çıxarılmış həmvətənlərimizin öz ata-baba torpaqlarına
qayıdışı üçün müvafiq zəmanət mexanizmi olan və hüquqi baxımdan məcburi olan
beynəlxalq razılaşmaya nail olunmalıdır. Beynəlxalq hüquq normalarına hər zaman
hörmətlə yanaşan Azərbaycan dövləti Qarabağ iqtisadi zonasında yaşayan erməni vətəndaşların
hüquq və təhlükəsizliyini təmin edirsə, Ermənistan da qarşılılıq prinsipi əsasında
Qərbi azərbaycanlıların öz tarixi torpaqlarına dönüşünü, onların hüquq və təhlükəsizliyini
təmin etməlidir.
Azərbaycan xalqı tam əmindir ki, ölkə
başçımız Müzəffər Ali Baş Komandan Cənab İlham Əliyevin müdrik və uzaqgörən
siyasəti sayəsində tarixi ədalət bərpa olunacaq.
Cavid Məmiyev
YAP Sumqayıt şəhər təşkilatının sədr
müavini
Xəbərdən istifadə edərkən istinad etmək vacibdir.
