"Azərbaycan böyük sülh sazişinə imza atmağa çoxdan hazırdır. Hətta imzalanacaq sazişlə bağlı konkret şərtlərimiz belə var və şərtlərimizi də bir neçə dəfə səsləndirmişik.”

Bu sözləri politoloq Fikrət Sadıqov, son aylar cəbhə xəttində baş verən gərginlik və erməni tərəfinin ciddi itkilər verməsi fonunda işğalçı Ermənistanın sülh sazişinə məcburi formada razı ola biləcəyinə dair səsləndirilən fikirlərə münasibət bildirərkən qeyd edib. 

Müsahibin sözlərinə görə, Azərbaycan tərəfinin əsas şərti torpaqların azad olunması şərti ilə danışıqların davam etdirilməsidir: "Sonrakı mərhələdə isə Dağlıq Qarabağın statusunun müəyyənləşdirərək danışıqların Azərbaycanın ərazi bütövlüyünün çərçivəsində aparılmasından ibarətdir. Lakin bütün bunlara baxmayaraq ermənilər müxtəlif bəhanələr törətməyə çalışırlar. Eyni halda böyük dövlətlər, xüsusilə Minsk Qrupunun həmsədrləri ermənilərin nazı ilə oynayırlar.”

Ermənistan tərəfinin təxribatla məşğul olmasının sonda atəşkəsin pozulması ilə nəticələndiyini söyləyən ekspert, "onlar əslində törətdikləri təxribatlarla bizi gözdən salmaq və Qarabağ məsələsində Azərbaycanın günahlandırılmasını istəyirlər” – deyə bildirdi: 

"Ermənistan tərəfi artıq başa düşür ki, Azərbaycanın gücü və hərbi potensialı onlardan qat-qat yüksəkdir. Təəssüflər olsun ki, işğalçı tərəf bütün təxribatları Azərbaycan ərazisindən həyata keçirirlər."  (interaztv.com)