Ötən həftə Rusiya televiziyasının efirindən "erməni genosidi” ifadəsini səsləndirdiyinə görə tənqidlə qarşılaşan İradə Zeynalova hələ də susur.
Onun haqqında tənqidi yazılardan birinin müəllifi isə Azərbaycan Dövlət Televiziyasının Orta Asiya ölkələri üzrə keçmiş nümayəndəsi jurnalist Aida Eyvazlı olub. Vzglyad.az-da "İradə Zeynalovaya açıq məktub” adı ilə yayımlanan yazının oxunma sayı artıq 400 minə çatır. Aida Eyvazlının yazısına reaksiya təkcə Rusiya və Azərbaycanda deyil, bütün keçmiş Sovet ölkələrindən gəlib.
Müəllif isə narazıdır:
- Yazıya görə həm minnətdarlıq, həm də təhqir dolu məktublar almışam. Yazım psevdojurnalistləri məyus edib. Mənim etirazım İradə Zeynalovaya yox, düşmənlərimizədir. Qoy, genosiddən əl çəksinlər. Erməni qızı Azərbaycan həqiqətlərindən yazır, bizdə manşet edirlər. Mənim yazıma isə dırnaqarası baxırlar. Media müğənnilərin hamamını, yatağını təqdim etmək yerinə, başımıza açılan oyunları dünyaya çatdırmalıdır. 
Günay Arda, femida.az