"Son illər ölkəmizin artan iqtisadi imkanları, regionda lider dövlət kimi çəkisinin artması, suverenliyimizin bərpası onun qonşuları ilə əlaqələrinə də müsbət təsir göstərib. Azərbaycanın qonşu ölkələrlə bağlı siyasətində Gürcüstanla münasibətlər mühüm əhəmiyyət kəsb edir. Belə ki, Azərbaycan öz enerji resurslarının Avropa bazarlarına çatdırılmasında, eyni zamanda, Şərqdən Qərbə gedən yüklərin daşınmasında Gürcüstan mühüm tranzit rol oynayır. Azərbaycanla Gürcüstanı təkcə iqtisadi amillər deyil, eyni zamanda tarixi köklər birləşdirir. Azərbaycan-Gürcüstan dostluğunun çox qədim tarixi var və bu iki ölkə təkcə qonşu və dost deyil, həm də mühüm strateji tərəfdaşdır."
Xeberle.com xəbər verir ki, bu sözləri mətbuata aşıqlamasında Milli Məclisin deputatı Müşfiq Məmmədli deyib. M. Məmmədli bildirib ki, birgə həyata keçirilən infrastruktur layihələri - nəqliyyat, enerji layihələri bir çox ölkələr üçün böyük əhəmiyyət kəsb edir və bundan sonra da bu istiqamətdə əlavə addımlar atılacaq: "Bakı-Tbilisi-Qars dəmir yolunun bir-iki aydan sonra artıq genişləndirilmiş formada fəaliyyətə başlaması böyük nailiyyətlərdən biridir. Çox yaxın müddətdə dəmir yolunun ötürmə qabiliyyəti 1 milyon tondan 5 milyon tona çatdırılacaq və eyni zamanda, bu dəmir yolunun fəaliyyəti bir çox ölkələr üçün də cəlbedici olacaq. Həmçinin mühüm iqtisadi əlaqələrdən biri də Azərbaycan qazıqnın Gürcüstan vasitəsilə bir neçə ölkəyə ixrac edilməsidir. Belə ki, Azərbaycan qazını alan ölkələrin sayı 8-ə çatıb və bu, son deyil. Yaxın gələcəkdə bu ölkələrin sayı artacaq."
Deputat qeyd edib ki, Azərbaycan-Gürcüstan dövlət olaraq bir-birinin bütün dövrlərdə suverenliyini, ərazi bütövlüyünü, sərhədlərin toxunulmazlığını dəstəkləyən açıqlamalar verib, müvafiq beynəlxalq təşkilatlarda səsvermə zamanı bir-birini dəstəkləyib, bundan sonra da bu dəstək davam edəcəkdir.
Xəbərdən istifadə edərkən istinad etmək vacibdir.
