20 sentyabr 2024-cü ildə Prezident İlham Əliyev Xankəndidə, yenicə yaradılmış Qarabağ Universitetində etdiyi çıxışında Azərbaycan xalqının tarixi zəfərindən, Vətən müharibəsi və antiterror əməliyyatlarının əhəmiyyətindən danışaraq, dövlətin suverenliyini tam bərpa etməsinin, xalqın iradəsi və əzmi ilə əldə olunmuş tarixi ədalətin bərpasının vacibliyini vurğuladı. Çıxışda həm tarixi perspektivlər, həm də gələcəyə dair strateji baxışlar önə çıxarıldı.
Prezident Əliyev çıxışında Azərbaycan Ordusunun 2020-ci ildə qazandığı İkinci Qarabağ müharibəsindəki qələbənin və bir il əvvəl baş vermiş antiterror əməliyyatının milli suverenlik və ərazi bütövlüyü baxımından fundamental dönüş nöqtəsi olduğunu vurğuladı. O bildirdi ki, 44 günlük Vətən müharibəsi dövründə Ordumuz hər gün irəli gedərək işğal altındakı əraziləri bir-bir azad etmişdir. Bu, nəinki hərbi bir uğur, həm də Azərbaycan xalqının milli qürurunun bərpası idi. Dövlət başçısının sözlərinə görə, Ermənistan ordusunun acınacaqlı duruma düşdüyü və Ermənistanın 12 mindən çox fərarisinin olduğu bir vaxtda, Azərbaycan Ordusu bir nəfər belə döyüş meydanını tərk etməmişdi. Bu, Azərbaycan xalqının mənəvi və psixoloji üstünlüyünü göstərirdi.
Prezident İlham Əliyev həmçinin qeyd etdi ki, İkinci Qarabağ müharibəsində 90 mindən çox azərbaycanlı gənc iştirak edib və 3200-dən çox qəhrəmanımız şəhid olub. Onların əziz xatirəsi daim qəlblərdə yaşayacaq və bu qələbə Azərbaycan xalqının milli şüurunda əbədi yer tutacaq.
Prezident çıxışında Qarabağın tarixi haqqında da geniş məlumat verdi. O, XIX əsrin əvvəlində bağlanmış Kürəkçay, Gülüstan və Türkmənçay müqavilələrinin erməni əhalisinin Qarabağa köçürülməsi ilə nəticələndiyini və bunun Azərbaycan torpaqlarının işğalına təkan verdiyini vurğuladı. XX əsrin əvvəllərində isə "Dağlıq Qarabağ Muxtar Vilayəti”nin yaradılması ilə separatizmin təməli qoyuldu və bu addım Azərbaycan torpaqlarının daha da parçalanmasına xidmət etdi. Prezident Əliyev Ulu Öndər Heydər Əliyevin 1969-cu ildə hakimiyyətə gəldiyi zaman separatçı hərəkətlərin basdırıldığını, lakin 1987-ci ildə onun istefasından sonra yenidən baş qaldırdığını qeyd etdi. Bu tarixi faktorlar, Azərbaycanın qarşısında uzun illər boyunca mürəkkəb və ədalətsiz bir sınaq kimi dayanmışdır.
Prezident İlham Əliyev beynəlxalq hüququn Azərbaycanın ərazi bütövlüyünün və suverenliyinin bərpasında əsas rol oynadığını qeyd etdi. O, Azərbaycan Ordusunun Vətən müharibəsi dövründə bir neçə müdafiə xəttini keçərək düşmənin mövqelərini darmadağın etdiyini və bu zaman Ermənistanın 15 mindən çox hərbi kontingentinin iflic vəziyyətinə düşdüyünü vurğuladı. Antiterror əməliyyatı zamanı əldə olunan qələbə də bir neçə saat ərzində erməni separatçı qüvvələrinin məğlub olması ilə nəticələndi. Azərbaycan öz gücünü və iradəsini nümayiş etdirərək bir daha göstərdi ki, beynəlxalq hüququn bərpası yalnız güclü dövlətlər tərəfindən təmin edilə bilər.Azərbaycan bu qələbəsi ilə təkcə öz ərazi bütövlüyünü təmin etmədi, həm də dünya xalqlarına ədalətin necə əldə olunacağını göstərdi. Prezident İlham Əliyev çıxışında qeyd etdi ki, işğaldan əziyyət çəkən xalqlar üçün Azərbaycanın nümunəsi ümid işığıdır. İnam və ədalət uğrunda mübarizə aparmadan heç bir haqq əldə edilə bilməz.
Çıxışın ən vacib məqamlarından biri Prezident Əliyevin Azərbaycanın gələcək nəsillərinə etdiyi çağırış idi. O, milli birliyin və vətənpərvərlik ruhunun önəmini vurğulayaraq gənclərin milli ruhda tərbiyə olunmasının vacibliyini qeyd etdi. Azərbaycan xalqı 44 günlük Vətən müharibəsində bütün cəmiyyət olaraq vahid məqsədə xidmət edərək mütləq birlik nümayiş etdirdi. Gənclər öz mədəniyyətlərinə, ənənələrinə, mənəvi dəyərlərinə sadiq qalmalı, xarici təsirlərə qarşı ayıq olmalıdırlar.
Prezident həmçinin təhsilin və müəllimlərin rolunu yüksək qiymətləndirdi. Müəllimlərin gənc nəslin həm bilik, həm də milli şüurda tərbiyəsində fəal rol oynamalı olduğunu vurğuladı. Qarabağ Universitetinin yaradılmasını isə tarixi hadisə adlandırdı və bu təhsil ocağının Qarabağın inkişafında mühüm rol oynayacağını bildirdi.
Qarabağ Universiteti: İnkişaf və İnnovasiyaların Mərkəzi
Prezident İlham Əliyev çıxışında Qarabağ Universitetinin yaranmasını əhəmiyyətli hadisə kimi qiymətləndirdi. 1200 tələbə ilə fəaliyyətə başlayan bu universitet ölkənin bütün bölgələrindən tələbələri bir araya gətirir və Qarabağın inkişafı üçün təhsil mərkəzi olaraq xidmət edəcək. Qarabağ Universiteti həm təhsildə, həm də tədqiqatlarda önəmli bir mərkəzə çevrilərək, Azərbaycanın yeni nəsil liderlərinin yetişməsində böyük rol oynayacaq.
Prezident İlham Əliyevin Qarabağ Universitetində etdiyi çıxış Azərbaycan xalqının qələbəsini və gələcəyə baxışını əks etdirir. Tarixi ədalətin bərpası beynəlxalq hüququn zəfəri, milli birlik və vətənpərvərlik ruhu bu çıxışın əsas mövzuları oldu. Qarabağda yeni tikilən məktəblər, universitetlər və infrastruktur layihələri ilə regionun inkişafı sürətlə davam edəcək və bu, Azərbaycanın tarixi zəfərinin möhkəmlənməsinə töhfə verəcək.
Ağanənə Seyidqızı,
"Ülvi” Aztəminatlılara Dəstək İctimai Birliyinin sədri, AYB-nin üzvü
Xəbərdən istifadə edərkən istinad etmək vacibdir.
