Belarusun adi silahların ixracına dair BMT-nin Xüsusi Reyestrinə təqdim etdiyi məlumatlar açıqlanıb.

Rəsmi Minskin təqdim etdiyi məlumatlara əsasən ölkə 2013-2014-cü illərdə adi silahlar ixrac etməyib.

Lakin digər mənbələrdən BMT-yə daxil olan məlumata görə, Belarus Slovakiyaya 5 ədəd BMP-2 satıb. Eyni zamanda 2007-2012-ci illər ərzində Belarusun ən çox silah və hərbi texnika satdığı ölkə Azərbaycandır.

Belarusun BMT-yə təqdim etdiyi məlumatlara əsasən bu ölkə Azərbaycana 62 ədəd T-72 tankı və 1 ədəd Su-25 hücum-bombardmançı təyyarəsi, Yəmənə 14 ədəd T-80 tankı, Böyük Britaniyaya 1 ədəd Su-27 qırıcısı satıb.

2011-ci il üçün silah ixracına dair rəsmi məlumatlar BMT-yə təqdim edilməyib. Lakin BMT-nin adi silahlar üzrə Reyestrinin digər mənbələrdən əldə etdiyi məlumata görə, Belarus Azərbaycana həmin il 31 ədəd T-72 tankı, 60 ədəd BTR-70, 90 ədəd yedəyəalınan 122 millimetrlik D-30 qaubitsası, 4 ədəd Su-25 hücum-bombardmançısı satıb.

2010-cu il üçün təqdim edilmiş rəsmi məlumata əsasən Belarus Yəmənə 66 ədəd T-80 tankı, Sudana 1 ədəd Su-25 təyyarəsi, Nigeriyaya iki Mi-24 zərbə vertolyotu, Azərbaycana 1 ədəd Su-25 hücum-bombardmançısı və 30 ədəd D-30 qaubitsası satıb.

2009-cu ildə isə Belarus Uqandaya 23 ədəd T-55 tankı, Azərbaycana 5 ədəd Su-25 hücum-bombardmançısı, 9 ədəd özüyeriyən, 203 millimetrlik (nüvə başlıqlı mərmilər ata bilir) 2S7 "Pion” qaubitsası, Sudana 3 ədəd Su-25 satıb.

Azərbaycan Belarusdan silah idxalını 2008-ci ildə də davam etdirib. Həmin il Belarus Azərbaycana 3 özüyeriyən 2S7 "Pion” qaubitsası satıb.

Suriyaya 33 ədəd MiQ-23 qırıcısı, Sudana 11 ədəd Su-25, Rusiyaya 15 ədəd "hava-hava” raketi satıb.

2007-ci ildə isə Belarus Sudana 2 ədəd BTR-70, Ermənistana 10 ədəd 122 millimetrlik D-30 qaubitsası, Eritreyaya "Uraqan” reaktiv yaylım atəşi sistemi satıb.

2006-cı ildə isə Belarus təkcə Azərbaycana silah ixrac edib. Azərbaycan həmin il bu ölkədən 41 ədəd T-72 tankını alıb.

Azərbaycan Belarusdan 2005-ci ildə də tank alıb - 19 ədəd T-72 tankı.

Həmçinin Belarus Slovakiyaya iki Mi-8 hərbi-nəqliyyat vertolyotu, Cibutiyə iki Mi-24 vertolyotu satıb.

BMT Reyestrinin məlumatlarından görünür ki, Azərbaycan 1996-2004-cü illərdə Belarusdan silah idxal edən ölkələr arasında olmayıb. Yəni Azərbaycanın Belarusdan böyük miqdarda silah və hərbi texnika alması prezident İlham Əliyevin hakimiyyətə gəlişindən və Belarusla ikitərəfli münasibətlərin inkişafının vüsət almasından sonra başlayıb.

BMT Reyestrinin məlumatlarından görünür ki, Azərbaycan ötən illər ərzində təkcə Belarusdan üst-üstə 153 ədəd T-72 tankı, 11 ədəd Su-25 hücum-bombardmançı təyyarəsi, 60 ədəd BTR, 120 ədəd qaubitsa, 12 özüyeriyən "Pion” qaubitsası (dünyanın ən güclü və ən uzaqvuran artilleriya sistemi hesab olunur) alıb.

Ermənistana isə praktiki olaraq Belarusdan silah ixracı olmayıb. Həmin dövr ərzində Azərbaycanın Rusiya, Ukrayna, Türkiyə, İsrail və hərbi-texniki tərəfdaşlıq etdiyi digər ölkələrdən idxal etdiyi silah və hərbi texnika da bura əlavə edilsə ordumuzun hərbi gücünün hansı səviyyəyə qalxdığı, Ermənistanın işğalçı qüvvələrinin hərbi potensialını necə dəfələrlə üstələdiyi haqda təsəvvür yaranar.  (Virtualaz.org)