Çox yaxın günlərdə xarici işlər naziri Elmar Məmmədyarov işən çıxarılacaq. Azərbaycanın Avropa Şurası, ardınca da Avropa Ittifaqındakı səfiri olmuş, hazırda isə Islam Konfransı Təşkilatının Avropa Birliyindəki missiyasına rəhbərlik edən Arif Məmmədovla bağlı qalmaqdan sonra hakimiyyətdə xarici işlər nazirinə qarşı tam etimadsızlıq yaranıb. Bu barədə istiqlal.az-a hakimiyyətə yaxın mənbələrdən məlumat daxil olub.
Hakimiyyətdə belə hesab edirlər ki, A.Məmmədov qalmaqalı E.Məmmədyarovun Qərbin Azərbaycan hakimiyyətinə tənqidi yanaşan çevrələri ilə sıcaq münasibətinin nəticəsi olaraq ortaya çıxıb: Ümumiyyətlə, XİN-də Azərbaycan hakimiyyətinin maraqlarına xidmət etməyən, Qərb çevrələri tərəfindən idarə olunan qrup mövcuddur. Bu qrup isə E.Məmmədyarov tərəfindən himayə edilir. Ona görə də nazirə qarşı etimadsızlıq mühiti formalaşıb. Böyük ehtimalla Avropa oyunlarından sonra nazir istefaya göndəriləcək.
Hakimiyyət diplomatik korpusun fəaliyyətinə və tərkibinə yenidən baxmağı qərara alıb. Adı qara siyahıda olan Avrpoadakı səfirlər sırasında Azərbaycanın Avropa İttifaqındakı səfiri Fuad İsgəndərov, Azərbaycanı NATO-da təmsil edən Xəzər İbrahim, Azərbaycanın Fransadakı səfiri Elçin Əmirbəyov, Azərbaycanın Almaniyadakı səfiri Pərviz Şahbazov və başqaları vaxtından əvvəl geri çağrılacaq. Səbəb onların Azərbaycanın maraqlarını layiqincə qoruya bilməmələridir. (istiqlal.az)
Xəbərdən istifadə edərkən istinad etmək vacibdir.
