İşğal altında olan torpaqlarımızın geri qaytarılmasından sonra gündəmdə olacaq məsələlərdən biri də məcburi köçkünlərin yenidən öz doğma torpaqlarına qayıtması prosesi olacaq. Etiraf edək ki, bu proses nə qədər arzu olunandısa, bir o qədər qəlizdir. Çünki dağıdılmış, minalanmış ərazilərdə görə bir çox problemlərlə üzləşəcəyik.
Ərazi bütövlüyü və köçkünlərin yenidən öz torpaqlarına qayıtma hüququnu dünyanın aparıcı təşkilatları - BMT, ATƏT, AŞPA kimi qurumlar tanıyır. Məsələ ilə bağlı açıqlama verən iqtisadçı Nicat Hacızadə bildirir ki, qarşıya qoyulacaq əsas məsələlərdən biri işğaldan azad edilmiş ərazilərdə iş yerlənin açılması və ordaki əhalinin öz ixtisasına görə işlə təmin olunmasıdır.
Nəzərə alsaq ki, Qarabağın turizm, kənd təsərrüfatı, dağ-mədən sahəsində iqtisadi potensialı var, o zaman bu regiona küllü miqdarda investisiyanın cəmləşdirilməsi o qədər də problemli məsələ olmayacaq. İqtisadçı bildirir ki, Dağlıq Qarabağ problemi həll olunduqdan sonra, Qarabağ zonasına yatırımlar olacaq: "Yatırımların 3 hissəyə bölünməsi nəzərdə tutulur. Nəzərə alsaq ki, işğalçı tərəfindən Qarabağ və ətraf rayonlarda infrastruktur dağıdılıb, infrastrukturun bərpası vacibdir. Bu həm zonanın gələcək turizm potensialı, həm də əhalinin sosial rifah halını yaxşılaşdırmaq üçün nəzərdə tutulacaq. Turizm sektorunun inkişafı baxımından Qarabağ ən gözəl bölgələrimizdən biridir. Xüsusilə, Şuşa şəhəri Sovet dövründə də Azərbaycanın ən çox ziyarət edilən bölgələrindəndir. O cümlədən digər rayonlar dağ turizmi, mədəniyyət turizimi baxımından ən sərfəli mövqelərə malikdirlər. Bundan əlavə Dağlıq Qarabağ zonası kənd təsərrüfatı, xüsusilə maldarlıq və əkinçilik üzrə sovet dövründə Azərbaycanın ən gəlirləri bölgəsi idi.
Kənd təsərrüfatı üzrə Xankəndi, Laçın, Qubadlı, Zəngilan zonası ən əlverlişli yerlərdir. İnvestisiyalar əsasən kənd təsərrüfatı və maldarlıq üzrə yönələcək. Bundan əlavə dağ-mədən sənayesi, xüsusi ilə qızıl ehtiyatları üzrə Kəlbəcər rayonu Sovet dövründə ittifaqın əsas qızıl hasilatı ilə məşğul olan zonalarından biri olmuşdur. Qızıl sənayesinə qoyulan investisiya və qızıl ehtiyatlarının yığılması Azərbaycan iqtisadiyyatına, xüsusilə ÜDM-ə çox ciddi təsir göstərəcək”.
Onu da xatırladaq ki, Dağlıq Qarabağ əhalisi əsasən kənd təsərrüfatı və maldarlıqla məşğul olub. Təbii ki, qeyd edilən sahələr düzəldikdən sonra istənilən halda əhali üçün xüsusi iş yerləri açılacaq. Məsələn, mebel sənayesi Qarabağ və ətraf rayonlar üçün əlverişlidir.
Ümumiyyətlə, heç kəsə sirr deyil ki, ərazi bütövlüyümüz təmin olunduqdan sonra Qarabağda sürətlə inkişaf gedəcək, Azərbaycan iqtisadiyyatı isə daha qüdrətli olacaq. Ekspertimizin də dediyi kimi azad olunmuş Qarabağa yatırılacaq yatırımları və regionun potensialını nəzərə alaraq bildirmək olar ki, bu gözəl yurd yerimiz həm də "Azərbaycanın mədəniyyət beşiyi” statusunu yenidən qaytaracaq. (atv.az)
Xəbərdən istifadə edərkən istinad etmək vacibdir.
