Aprelin 15-18-də Almaniyanın Laynsvayler şəhərində bu ölkənin ATƏT-ə sədrliyi çərçivəsində ATƏT Parlament Assambleyasının (PA) Bundestaqla "ATƏT-in münaqişə dövrünün kəsilməsi istiqamətindəki tədbirlərinə ATƏT Parlament Assambleyası və onun üzvlərinin geniş töhfə vermək imkanları - həlli uzadılmış münaqişələrə xüsusi diqqət" mövzusunda birgə seminar keçirilib. Tədbirdə 16 ölkədən 60-dan çox nümayəndə iştirak edib.

Azərbaycanın ATƏT PA-dakı nümayəndə heyətinin üzvü, deputat Tahir Mirkişili Modern.az-a açıqlamasında bildirib ki, tədbirdə Avropa Birliyi ərazisində olan münaqişələrdən, ərazi mübahisələrindən söz açılıb, xüsusi olaraq Saar-Lor-Lux və Cənubi Tirol muxtar regionlarının tarixi, bugünkü idarəetmə formaları barədə təqdimat nümayiş etdirilib. Almaniya və Fransa, Avstriya və İtaliya arasında olan münaqişələrin öz həllini necə tapdığı müzakirə olunub və bu formaların xalqlara və regiona sülh və inkişaf gətirdiyi xüsusi vurğulanıb. Hər iki münaqişənin ölkələrin ərazi bütövlüyü çərçivəsində yüksək mustariyyət statusu ilə həlli mexanizmi aydın göstərilib.

Deputat qeyd edib ki, çıxış edən Avropa ölkələri parlament üzvləri Azərbaycan-Ermənistan arasındakı Dağlıq Qarabağ münaqişəsinin tezliklə həll olunması vacibliyini dilə gətirib və bunun üçün artıq zamanın keçdiyini vurğulayıblar.

"Saar regionunun keçmiş prezidenti Reinhard Klimmt öz çıxışında yüksək muxtariyyətin xalqların birgə yaşaması üçün uğurlu forma olduğunu qeyd edərək, bunun üçün ayrıca milli dövlət yaratmağa gərək olmadığını vurğulayıb. Çıxış edən nümayəndlər bu mövqe ilə həmrəylik nümayiş etdirərək, münaqişə tərəflərini gələcəyə baxmağa çağırdılar”.

T.Mirkişilinin sözlərinə görə, Ermənistan nümayəndələrinin destruktiv, faktları saxtalaşdırmaq və ittiham istiqamətli çıxışları tədbir iştirakçıları tərəfindən etirazla qarşılanıb.

"Mili Məclis sədrinin müavini Bahar Muradovanın başçılıq etdiyi nümayəndə heyəti isə Azərbaycanın rəsmi mövqeyini, 20 ildən çoxdur davam edən danışıqlar prosesini, yenilənmiş Madrid prinsiplərini, Azərbaycanın daim sülhsevər siyasətini, hər iki icmanın Dağlıq Qarabağda birgə dinc yaşama perspektivlərini diqqətə çatdırdı. Qeyd olundu ki, Ermənistan işğalçı ordusu təcili olaraq Azərbaycan ərazilərin tərk etməlidir, insanlar öz yurdlarına dönməlidirlər və yalnız bundan sonra Dağlıq Qarabağın Azərbaycan tərkibində statusu müəyyən olunmalıdır. Bu yanaşma tamamilə bir Avropa yanaşmasıdır, sülhə və inkişafa nail olmağın yeganə və yoxlanılmış yoludur”.

Deputat bildirib ki, bu tədbir, iştirakçı dövlətlərin çıxışları bir daha göstərdi ki, işğala təcili son qoyulmalıdır, münqişə mərhələri şəkildə Azərbaycanın ərazi bütövlüyü çərçivəsində həll olmalıdır, Dağlıq Qarabağda hər iki icma birgə yaşamalıdır. Onun sözlərinə görə, tədbirin sonunda Ermənistan nümayəndə heyətindən başqa demək olar ki, hər kəsin yekun fikri məhz belə olub.

Aytən ZƏHRA