Sumqayıtlı gənc fəal, "Ümid" partiyasının sədr müavini vəzifəsini tutan Həcər Abbaslı partiya sıralarından ayrıldığını açıqlayıb.
Bu barədə Xeberle.com-a açıqlama verən H.Abbaslı bu qərarını partiya sədrinin idarəçilik prinsiplərinin partiyada yaratdığı xoşagəlməz vəziyyətlə əlaqələndirib. Xanım Abbaslının istefa bəyanatında deyilir:
"Mən Həcər Abbaslı bu gündən ÜMİD partiyası sədrin gender məsələləri üzrə müavini vəzifəsindən və partiya üzvlüyündən istefa verdiyimi bəyan edirəm.Bildirmək istəyirəm ki , istefamı partiya daxili qərarların demokratik yolla qəbul edilməməsi, partiya daxili idarəçiliyinin üzvlərin ictimai siyasi təcrübəsi, fərdi potensialı, prespektivi və ümumkomanda maraqlarının əsasında deyil, sədrin şəxsi münasibətləri zəmnində aparılması bu qərarı verməyimə səbəb oldu. Qərarımı qətiləşdirən başqa bir fakt Azərbaycan Respublikası Milli Məclisinə 2016 ci il 18 İyun təkrar seçkilərində iştirak etmək istəyim və bu qərarımın partiya sədri tərəfindən rədd edilməsi, həmçinin sədrin özünün namizədliyini partiya rəhbərliyi və üzvləri ilə müzakirə etmədən gizli şəkildə irəli sürməsi olmuşdur. Bəyan edirəm ki, bu gündən müxalif partiya imitasiyasında, cəmiyyətimizdəki demokratik inkşaf prosesində iştirak imitasiyasında rol almağı deyil, dövlətimiz və millətimiz naminə müstəqil siyasi fəaliyyətə başlamağa qərar verirəm".