"İran çox zaman dünyada olan islam ölkələrinə müsəlman qardaşlığı öyrətməyə çalışır. Onların ölkəsindəki azlıqlarla bağlı fəaliyyətlərinə sözüm yoxdur. Lakin Azərbaycan torpaqlarını işğal etmiş və saxta "Qarabağ Cümhuriyyəti" qurmuş, insanlıq suçu işlətmiş müsəlman düşməni erməniləri nə adla İranda təşkil olunan erməni olimpiadasına dəvət ediblər?"
Bu sözləri Dünya Azərbaycanlıları Konqresinin sədri və AKİDER başqanı Asif Kurban Facebook səhifəsində paylaşdığı İrana etiraz bəyanatında bildirib. O, bunun ilk olmadığını, İranın dəfələrlə Ermənistan-Azərbaycan məsələsində erməniyönümlü addımlar atdığını xatırladıb. A. Kurban olayla bağlı İranın Bakıdakı səfirinin açıqlamasına toxunaraq bunları deyib: "Cənab səfir bu oyunları düzənləyən komitə ilə simgələrin müzakirə olunmadan ora qoyulduğunu və Qondarma Qarabağ Respublikasından gələnlər barədə İran dövlətinin xəbəri olmadığını bildirir. Əslində isə bu çox inandırıcı deyildir. Dövlətin və təhlükəsizlik orqanlarının xəbəri olmadan İranda bu addımın atılması mümkünsüzdür."
"DAK olaraq qarşı tərəfdən etdiyi xətaya görə Azərbaycandan üzr istəməsini gözləyirik" deyən DAK sədri İranın Qarabağ məsələsində siyasətinin dəyişmədiyini söyləməsini sadəcə kağız üzərində bir bəyanat adlandırıb: "İran ilə Azərbaycan uzun illərdir gonşudurlar. İranda 35 milyona yaxın azərbaycanlı yaşayır. İran azərbaycanlılara və qonşusu, islami dəyərlərə də sahib olan Azərbaycan dövlətinə hörmət ilə yanaşmalıdır."
Odur ki, qonşuluq siyasətində diqqətli olmaq lazımdır- deyən natiq bunu xüsusi olaraq vurğulayıb.
Xəbərdən istifadə edərkən istinad etmək vacibdir.
